ألي الأخوات من مصر ممكن حد يساعدني في إيجاد شادو

[أم عمر و يوسف]

السلام عليكم و رحمة الله و بركاته
أنا عضوة جديدة أرجو أن أمد يد العون لكل الأمهات للوصول بأبنائنا الي ما نحلم به.

أنا ابني يوسف عنده 5 سنين و نصف هو عنده سمات توحد يعني بيتكلم ترديد كلام فقط (إكولاليا) , هو يفهم الأوامر مثل هات ميه يا يوسف , أفتح الباب و الكثير من الأوامر بفضل الله . أنا أدخلته مدرسة و لكن الأدارة طلبت مدرسة دعم (شادو تيتشر) أنا جبتله واحدة بس المدرسين قالولي انها بتسيبه يلعب لوحدة و كمان مش بتعمل معاه أي أنشطة.

أنا محتاجة الشادو عشان تساعد في دمج يوسف مع الأطفال و تعويده علي اللعب مع من هم في سنه و انتظار الدور. بالله عليكم إذا كان هناك أحد يعلم مكان أجد فيه شادو يبلغني . أنا أسكن في مدينة نصر و لكم مني جزيل الشكر و خالص الدعاء :23:

أختكم في الله أم يوسف
​

 

[الأمل و الشفاء]

رد: ألي الأخوات من مصر ممكن حد يساعدني في إيجاد شادو

إية رأيك تعملي إعلان صغير في الوسيلة أو الوسيط، يتكلف حوالي 50 جنية و في نفس الوقت إكتبي كل المواصفات اللي إنتي عاوزاها
من خلال خبرتي المتواضعة أنصحك بأنها تكون أخصائية تخاطب مش رياض أطفال، بتوع التخاطب هم اللي عندهم خطط مدروسة لدمج الأطفال، تخليهم يلعبو سوا، و تخلي إبنك يوزع عليهم نشاطات...و كدة يعني
ده بيدرسو في التخاطب و طريقة الدمج ومش رياض الأطفال اللي بيعملو، ربنا يوفقنا جميعا، إن شاء اللة أكون فدتك
قريتي موضوعي عن الفيروسات؟ ياريت تقريه ولو تقدري تشاركي فيه لو عندك أي فكرة.

 

[أم عمر و يوسف]

رد: ألي الأخوات من مصر ممكن حد يساعدني في إيجاد شادو

ألف ألف شكر و ربنا يباركلك و سأقرأ موضوعك أن شاء الله .
بس تعرف هي ممكن تتطلب في حدود كام أنا عاملة حسابي علي مبلغ و ربنا يعنا جميعاً:16:

 

[مةالله الرحمن]

رد: ألي الأخوات من مصر ممكن حد يساعدني في إيجاد شادو

أختى أم عمرويوسف
أنا ابنتى مثل حالة ابنك تردد الكلمات بدون فهم أحيانا
وأنا لا أعرف مدارس يمكن أن تقبلها
أرجو أن تزودينى بأسماء هذه المدارس بالهرم إن كان عندك أى معلومة
وهل يوافقون على أن أكون أنا الشادو ؟لأنى لا أأمن عليها الا معى أو مدرسة تخاطب كانت تدربها ولكن تزوجت فتوقفت حتى عن التخاطب لأن للأسف قليل من عنده ضمير فى أبنائنا ولكن
اللهم سخر لنا قلوب عبادك
آمين
وجزاك الله خيرا
اللهم اشفى ابنائنا
آمين

 

[أم عمر و يوسف]

رد: ألي الأخوات من مصر ممكن حد يساعدني في إيجاد شادو

أختي أمة الرحمن.
شكراً علي مرورك . و الله أنا كمان لا أأمن لأبني مع أي حد بس للأسف المدرسة قالولي ما انفعش أكون شادو معاه عشان كده هيتدلع أوي . و كمان أنا متابعة مع دكتورة دعاء الحضري و أكدتلي نفس الكلام بس للأسف مفيش ضمير الا من رحم ربي .:7:
أما عن المدارس فأنا ساكنة في مدينة نصر بس أنا معايا دليل مدارس ممكن تقبل ولادنا , بس أنا مش عارفه مستواها روحي و اسألي و ربنا المستعان :
1- مدارس مصر للغات .. أول طريق الفيوم بعد نادي الرماية
2- مدرسة أمل الهرم ... محطة مشعل - ش الوفاء و الأمل من شارع الهرم.
3- مدرسة الأورمان الخاصة .... ش زغلول - طريق أبو الهول الهرم
4- مدرسة العمرانية الإبتدائية المشتركة

أرجو أن أكون قد أفدتك و شفا الله مرضانا جميعاً:23:

 

[الأمل و الشفاء]

رد: ألي الأخوات من مصر ممكن حد يساعدني في إيجاد شادو

حبيباتي حالي حالكم، بس من المستحيل أن الأم تكون شادو. المفروض الشادو بتعمل حاجات كتير جدا جدا و معاكم حق بنخاف على ولادنا بس الله المستعان وربنا يحنن قلوب الناس عليهم.
عندي إقترح يمكن لازم تقربيها منك و مثلا تخليها تحي البيت وهي نفسها اللي تدي تخاطب لإبنك بكدا تقدري تتعرفي عليها شويه، و خليها تدخل إبنك الحمام قدامك و تقضو مع بعض وقت وما فيش مانع تبقي تخليها تتغدى معاكم. والله الستعان

 

[الله الشافى]

رد: ألي الأخوات من مصر ممكن حد يساعدني في إيجاد شادو

السلام عليكم ورحمه الله وبركاته


الاخت الفاضله ام عمر ويوسف ......شفى الله ابنك وابناء الجميع اللهم امين

لو تكرمتى قد ذكرتى انكى تتعاملين مع الدكتوره دعاء الحضرى ........فنرجو معرفه رأيك فيها وفى علاجها وهل حقق بفضل الله تحسن واضح للطفل ؟ وهل اخذ جلسات اكسجين وما نتيجتها وهل تحبذيها ؟.......نرجو ان لم نثقل عليكى شرح لتجربتك مع الدكتوره دعاء .

ومن فضلك اختنا الكريمه كيف يمكن الحصول على هذا الدليل للمدارس الذى اشارتى اليه ؟

جعل الله ردكم علينا وقضاء حاجتنا فى هذه الامور فى ميزان حستاتكم وسببا فى شفاء ابنكم .اللهم امين .

 

[مةالله الرحمن]

رد: ألي الأخوات من مصر ممكن حد يساعدني في إيجاد شادو

أختى أم عمرويوسف
جزاك الله خيرا على تعاونك واهتمامك وجعل ذلك فى ميزان حسناتك

....
الأخت الأمل و الشفاء جزاك الله خيرا
اللهم اشفى أبنائنا جميعا عن قريب يارب
آمين​

 

[ازميرالدا]

رد: ألي الأخوات من مصر ممكن حد يساعدني في إيجاد شادو

اختي اسألي في مركز التقدم Advance بالمعادي
كانوا يقوموا بعمل دورات تأهيليه لمن يريد ان يصبح شادو تيتشر ويوفرون هذه الخدمه لمن يحتاج

 

[احمد ذكى]

رد: ألي الأخوات من مصر ممكن حد يساعدني في إيجاد شادو

السلام عليكم ورحمة الله وبركاتة
الاخت الفاضلة امه الله الرحمن شفى الله ابنك وابنى وابناء المسلمين امين
ابنى محمد يبلغ من العمر ستة سنوات ونصف وعندة سمات توحد وادخلتة هذة السنة مدرسة الملكة اللى فى شارع الطالبية فى فيصل عندهم مبنى خاص للاطفال الاحتياجات الخاصة
وان عندك اى استفسار تفضلى

 

[احمد ذكى]

رد: ألي الأخوات من مصر ممكن حد يساعدني في إيجاد شادو

السلام عليكم ورحمة الله وبركاتة
الاخت الفاضلة ام عمر ويوسف شفى الله ابنك وابنى وابناء المسلمين امين
فى حضانة فى مدينة نصر فى الشارع المقابل للمول السراج مول اسم الحضانة تشايد اكاديمى صحابة الحضانة دكتورة فى كلية التربية وعندهم قسم للاطفال التوحد شغلهم ممتاز ابنى محمد كان عندهم ولكن لانى اسكن فى فيصل فلم اسطيع الاستمرار معهم للبعد المسافة ممكن تذهبى الى الحضانة وتشاهدى على الواقع وعلى فكرة الدكتورة صحابة الحضانة سيدة متعاونة وممكن تسعد حضرتك فى ايجاد مدرسة شادو
بعد اذن حضرتك انا بتابع ايضا مع د دعاء هل جربتى التكامل السمعى عندهم واو تعرفى حد جربةعندهم ولكى جزيل الشكر

 

[أم عمر و يوسف]

رد: ألي الأخوات من مصر ممكن حد يساعدني في إيجاد شادو

السلام عليكم يا أستاذ أحمد
شكراً لك علي اهتمامك.
والله انا رحت حضانة شايلد أكاديمي دي و اللي ماسكها دكتورة سماح كامل و كمان معاها أختها مش فاكرة أسمها . المهم ان كان في دادة هناك كدة تقريبا صعيدية من الناس اللي علي نياتهم أوي. لما جيت لاقيت يوسف قاعد علي السلم اللي قدام الباب. أخت دكتورة سماح قالتلي لما الولاد روحوا كان زعلان وقعد علي الباب . بس الدادة قالتلي دة طول اليوم كان قاعد علي السلم. و الله زعلت أوي. بس ما بقاش يروح هناك الكلام دة من سنتين يمكن يكونوا اتغيروا دلوقتي.
بالنسبة لدكتورة دعاء انا عملت عندها التكامل السمعي مرتين و الحمد لله في المرة الأولي كان يوسف يدوب بيطلع أصوات بعدها بحوالي 3 شهور ابتدي يقول مم و بو و حاجات ظريفة كدة. المرة التانية كانت في شهر 7 اللي فات و بعدها ابتدي يوسف يقول اكل سدوش(سندوتش) و النائج كويسة و الحمد لله. بس اللي انا بقولهولك ان التكامل السمعي نتائجة بتختلف من شخص للتاني . يعني ممكن يكون تأخر الكلام لأن الطفل فعلا مش بيستقبل الأصوات أو عنده حساسية في الأصوات يبقي في الحالة دي التكامل السمعي هيفيدة جداً. و ممكن يكون ما عندوش مشاكل من الناحية السمعية يبقي في الحالة دي التكامل السمعي مش هيأثر من ناحية الكلام و لكن هيساعدة بأنه هتكون أفكارة أكثر ترتيباً و كذلك سيتعرف علي البيئة بطريقة أحسن لأن التكامل السمعي له فوائد غير الكلام حيث يطبق مع الأطفال الذين لديهم فرط حركة و تشتت انتباه و كذلك الأطفال الذين لديهم صعوبات تعلم ليساعدهم علي التركيز . يعني ان شاء الله الأستفادة بتكون موجودة علي المدي.
و ربنا يعفو عن الكل و برجاء الدعء ليوسف و أطفال المسلمين جميعا

 

[أم عمر و يوسف]

رد: ألي الأخوات من مصر ممكن حد يساعدني في إيجاد شادو

أخي الفاضل
السلام عليكم و رحمة الله و شكراً علي مرورك.
بالنسبة للدليل انا جبته من مركز سيتي (جمعية كاريتاس مصر) و مكانها داخل مدرسة الفرير بالظاهر.
أما تجربتي مع دكتورة دعاء فكانت و بفضل الله تجربة ناجحة .ففي العام قبل الماضي كنت أبحث عن مركز يقوم بالتكامل السمعي و يكون سعره مناسب و بعد البحث وجدت مركز دكتورة دعاء و أيضاً وجدت انها طبيبة دان معتمدة يعني كلة في مكان واحد.
و الحمد لله التكامل السمعي الأول كان منذ عامين وأدي الي تحسن حالة يوسف حيث بدأ بنطق كلمات بسيطة و لكن في المرة الأخري و كانت في شهر 7 الماضي بدأ يقول جمل من كلمتين ثم 3 كلمات.
أما بالنسبة للأكسجين فأنا عملته ليوسف و أخذ 40 جلسة في البداية أعتقدت انه ما عملش اي حاجة مع يوسف و انه زي قلته . بس فرحت جداً لما عملت التحاليل ليوسف و لقيت أن الكانديدا اختفت . وزي ما حضرتك عارف ان الكانديدا من أخطر الفطريات و أعبها في العلاج بس الأكسجين بيموتها و كمان الأكسجين بيحسن القدرة علي تلقي أو استقبال جلسات تنمية المهارات يعني الأخصائية كانت بتقلي انه بقي يستوعب أحسن.
بس اللي انا بنصح بيه الناس هنا انك ما ترحش تاخد الأكسجين منك لنفسك لأنه لازم الدكتور و كانت دكتورة دعاء هنا هي اللي حددت إذا كان مناسب ولا يتأخر شوية و كمان لأن لازم يتاخد معاه مكملات و مضادات للأكسدة الدكتورة هي اللي تحدد الجرعات المناسبة عشان الإستفادة تكون كاملة بإذن الله

و الله المستعان و أنا تحت أمركم لأي استفسار و الله المستعان و برجاء الدعاء ليوسف و جميع مرضي المسلمين

 

[احمد ذكى]

رد: ألي الأخوات من مصر ممكن حد يساعدني في إيجاد شادو

السلام عليكم ورحمة الله وبركاتة
الاخت الفاضلة ام عمر ويوسف شفى الله يوسف وابنى محمد وابناء المسلمين امين
اشكرك على اهتمام حضرتك بالنسبة للتكامل السمعى يوسف اخذ كام جلسة فى كل كورس وهل لاحظت التحسن بعد الجلسات مباشرة
وبعد اذن حضرتك فى معمل بتجرى فية تحليل الكانديدا
اسف على الاطالة ولكى جزيل الشكر

 

[الله الشافى]

رد: ألي الأخوات من مصر ممكن حد يساعدني في إيجاد شادو

السلام عليكم ورحمه الله وبركاته

الاخت الفاضله ام عمر ويوسف......قبل كل شىء ندعو لابنك يوسف وابناء المسلمين جميعا بالشفاء العاجل غير اجل امين يارب العالمين .
نشكرك جزيل الشكر على ردك علينا واهتمامك فقد افدتينا كثيرا اكرمك الله وعفى عن يوسف يارب......ونرجو الانكون ممن يثقلون عليكى واستفسار بسيط من حضرتك ....هل جلسات الاكسجين اخذها يوسف عند د.دعاء ام فى مكان اخر وهل هو الاكسجين المضغوط ام النشط ؟ وفى اى مركز يااخت ام يوسف شخصتى حاله يوسف انها توحد وما رأيك فى المكان الذى شخصتى فيه حالته شفاه الله لكم امين يارب العالمين .

 

[الله الشافى]

رد: ألي الأخوات من مصر ممكن حد يساعدني في إيجاد شادو

السلام عليكم ورحمه الله وبركاته
الاخ الفاضل .احمد زكى بارك الله فيك وشفى لك ابنك وابناء الجميع من قضلك نود معرفه تقييم حضرتك لمدرسه الملكه التى بها ابنك هل تؤيدها ام لك رأى غير ذلك فيها .وجزيت خير الجزاء .

 

[ام التواءم]

رد: ألي الأخوات من مصر ممكن حد يساعدني في إيجاد شادو

اختى ام عمر ويوسف

انا فعلت كما قالت لك الاخت الامل والشفاء عملت اعلان فى الوسيط عن شادو وبالفعل جاءنى الكثير وفى الاخر اخترت واحدة عندها خبرة واشتغلت هذه المهنة من قبل وهذا هو المهم ان يكون لديها خبرة لان هناك من يجهل هذه المهنة...وربنا معك ان شاء الله...

 

[مةالله الرحمن]

رد: ألي الأخوات من مصر ممكن حد يساعدني في إيجاد شادو

لأخ أحمد زكى جزاك الله خيراعلى إهتمامك وشفا ابنك وابناءنا جميعا
وهل فعلا من خلال التعامل مع مدرسة الملكة لاحظت تقدم اجتماعى ؟

...
الأخت أم عمرو يوسف معلش بنسأل كتير أنا سمعت عن التكامل السمعى أرجو منك تبسيط فكرته وطريقة عمل الجلسات وكمان أسعارها
لأن انا إبنتى تسمع جيدا والحمد لله وتردد ورائى الكلمات ولكن غالبا بدون فهم
فإلى أى مدى يمكن أن يفيدها التكامل السمعى؟
وجزاك الله خيرا وبارك فيك ​

 

[أم عمار]

رد: ألي الأخوات من مصر ممكن حد يساعدني في إيجاد شادو

شفا الله ابنى وابنك قلتى انك تذهبين لدعاء الحضرى هل احسست بتحسن ام لا وهل عملت اكسجين وهل قالتللك قبل ماتعملى جلسات يجب تاخذى المكملات وماهى اسماؤها ارجوك

 

[أم عمر و يوسف]

رد: ألي الأخوات من مصر ممكن حد يساعدني في إيجاد شادو

السلام عليكم أخواني و أخواتي في الله
أعذروني في عدم الرد بالأمس لأن يوم الخميس يكون مشحون بالجلسات و يوم الجمعة يكون أجازة يوسف من الحضانة عشان كدة مش باعرف اجي ناحية الكمبيوتر.

الأخت (أمل و شفاء) : بارك الله فيك و جعلك أملاً لنا و تكوني سبب في شفاء مرضاكم و مرضانا جميعاً بإذن الله , و شكراً علي إهتمامك.

الأخت (أزميرالدا) : ألف شكر علي اهتمامك ذكرت مركز (أدفانس) في المعادي و انه يساعد في إيجاد شادو.... أنا أعرف أن الأسعار بتاعته عالية جداً يعني أكيد الشادو هتطلب مش أقل من ألف جنيه :7: , ما تعرفيش مكان تاني ؟ أنا سمعت عن مركز السمع و الكلام و هروح أسأل هناك أن شاء الله.

الأستاذ الفاضل (أحمد ذكي ): بارك الله فيك و شفي محمد و يوسف و أطفالنا جميعاً . جلسات التكامل السمعي هي عشرين جلسة كل جلسة نصف ساعة , تأخذ جلستين في اليوم بواقع 3 ساعات راحة بين الجلسة الأولي و الثانية . بالنسبة للتحسن فهناك أطفال ظهر عليهم التحسن من الجلسة الأولي , و لكن بالنسبة ليوسف فالتحسن ظهر معه بعد ثلاث شهور . كان في الشهر الأول عصبي جداااااااااااا و تنتابه نوبات غضب شديدة . و قد فسرت لي دكتورة دعاء أنه الأن أصبح يسمع أصواتنا بطريقة مختلفة مما يجعله يشعر بالغربة كأنه في بيئة جديدة غير التي تعود عليها و لكنه تحسن بعدها حيث أنه أثناء جلسات التخاطب أصبح ينطق الكلمات بصورة شبه صحيحة . و الله المستعان . بالنسبة لمعمل التحاليل فممكن تعمل في معمل البرج أو المختبر تحليل براز كامل و الله الشافي.

الأخ الكريم ( الله الشافي ) : شفا الله أبنك و أتم له , ليوسف و اطفالنا تمام الصحة و العافية .
بالنسبة لسؤالك حول الأكسجين هل هو مضغوط أم نشط ؟ هو أكسجين تحت ضغط جوي 1.4 لأن ذلك الضغط هو الإفادة حيث يدفع بالدم الي الأماكن أو الخلايا الخاملة في المخ و التي لا يستطيع الدم الوصول اليها . و بالنسبة للمركز التي قمت فيه بتشخيص حالة أبني كان عند دكتورة (هبة العيسوي) , ثم دكتورة ( مروي المسيري) و لكنك تستطيع الذهاب الي جمعية ( كاريتاس - مركز سيتي ) و مقره داخل مدرسة الفرير بالظاهر و سيقدمون لك هناك كل ما تحتاج اليه من كتب و مراجع ووسائل . و أيضاً هناك ( مركز رعاية ذوي الإحتياجات الخاصة ) و مقره داخل كلية التجارة جامعة عين شمس . أرجو أن أكون قد أفدتك و تحت أمرك في أي سؤال.

أختي (أم التواءم) : الف شكر علي أهتمامك و بارك الله فيك و حفظ لك التواءم .

أختي في الله ( أم عمار) : بالنسبة لسؤالك هل تحسن أم لا بعد الأكسجين ؟ فأقول لك أن صور التحسن تختلف من شخص لأخر. فبالنسبة ليوسف جاء التحسن من ناحسة أنه كان سرعة تحصيلة أحسن عند الجلسات و كذلك فأنه قلل من النوبات العصبية و هو بالنسبة لي و الحمد لله يعتبر شئ جميل لأن يوسف كان صعب حدا في التعامل معه .. كثير الصراخ و يرمي نفسه علي الأرض و يضرب كل من أمامه و يرمي بأي شيئ يقابله . و لكن ولله الحمد قلت تلك النوبات هي ما زالت موجودة و لكن بصورة أقل من الأول بواقع مرتين أو ثلاث يوميا في مقابل 15 مرة من قبل ز برجاء الدعاء له و لجميع أطفالنا لأن هناك أيام كنت أصاب فيها بانهيار من كل ذلك الصراخ و كان والده يسافر للعمل ولا يأتي سوي أيام الخميس و الجمعه و كان لا يطيق الجلوس بالبيت و كذلك لم يكن أحد يزورني عشان وجع الدماغ ده ( علي حسب تعبير الناس) . و الشفاء من عند الله . بالنسبة للمكملات الغذائية فهي توصف حسب كل حالة و حسب نقصها في الجسم حتي يستفيد منها الجسم أكثر أستفادة مثل ( سي , أ ,د, هـ ) و هناك أيضاً مضادات للأكسدة مثل ( بيكنوجينول) .

أرجو أن أكون قد أفدتكم جميعاً و بارك الله فيكم .