دعوة لليوم العالمي للتوعية بالتوحد

[السيد عبدالعظيم]

السلام عليكم ورحمة الله وبركاته،
الاثنين القادم والموافق 2 ابريل هو اليوم العالمي للتوعية بالتوحد
فكرنا فكرة صغيرة كده في الاسكندرية
ما تيجي فعلا نحتفل باليوم ونخليه يوم توعية حقيقي!
طيب عملنا ايه؟
اولا حجزنا القاعة الملكية في الابراهيمية على البحر من الساعة أربعة ونص إلى الساعة السابعة
ثانيا دعينا كبار المختصين في المجال في الاسكندرية. زي مين مثلاً؟
على سبيل المثال وليس الحصر علشان مننساش حد ويزعل مننا دعونا
أ/ أشرف لطيف - د/ دعاء عبداللطيف - د/ محمد فرغلي - أ/ اسراء ثابت - أ/ علاء شحاته - أ/ ريم دويدار - أ/ دعاء محمد - ............
والناس دي حتحضر بجد؟
احنا دعيناهم ورحبوا بشدة للحضور وحددنا مع أغلبهم عنوانين المواضيع اللي حيتكلموا فيها
وإيه كمان؟
دعينا ولسه بندعي أولياء الأمور والمختصين وغير المختصين بالمجال، والناس اللي ممكن اولادنا يتعاملوا معاهم مثلاً
أطباء أطفال، أصحاب مدارس، مديرة حضانة، مديري الجمعيات الأهلية، صحفيين
يعني الناس اللي محتاجين نعرفهم يعني ايه التوحد ومن خارج المجال
وبنطلب منكم
كل اللي يستطيع يحضر حيشرفنا والدعوة عامة
كل اللي يعرف حد بعيد عن المجال وتوعيته مهمة يتفضل يدعيه
وأخيرا عاوزين دعواتكم وإن شاء الله نقولكم أخبار اليوم بعد نهايته
ملحوظة للأخ كوكتيل طبيعي، لو انت في الاسكندرية حضورك مطلوب وفورا، ولو انت برة دعواتك

 

[أم وائل ولؤي]

رد: دعوة لليوم العالمي للتوعية بالتوحد

ماشاء الله عليكم ،،بالتوفيق يارب

 

[كوكـتـيـل طبيعي]

رد: دعوة لليوم العالمي للتوعية بالتوحد

حبيبي والله يا باشمهندس سيد

بره والله .. لكن قلبي معاكم وطالما انتم بالابراهيمية ياريت من عند الصفواني تبعتللي طاجن لحمة ضاني لاني نشفان والكبسة حتجيب اجلي

المهم قفلوا الابواب كويس الا العيال تهيبر وتنط بالبحر



ربنا يجعلها سنة بيضا مش زرقا http://classic.akhbarak.net/articleview.php?id=3271893

ولا تنسوا الاخت منى استاذة التخاطب بالابراهيمية شارع بورسعيد مع ان علاء شحاته بيقوللي انها حتسافر السعودية انسانة محترمة برضه

 

[فراشة التحدي]

رد: دعوة لليوم العالمي للتوعية بالتوحد

بالتوفييييييق
يعطيكم العافية

 

[ريم أحمد]

رد: دعوة لليوم العالمي للتوعية بالتوحد

جهد رائع
بالتوفيق إن شاء الله

 

[رادوبيس]

رد: دعوة لليوم العالمي للتوعية بالتوحد

موفقين باذن الله :m0dy_net-742:
ضرورى ان شاء الله احضر

 

[كوكـتـيـل طبيعي]

رد: دعوة لليوم العالمي للتوعية بالتوحد

انا عارف ان كلامي الجاي بيزعل منه ناس كثيرين .. لكن بكيفه ال يزعل يزعل


الدعوة فقط فقط >>>>> لمنسوبي التوحد ( الطفل + مرافقين بحد أقصى 2 )


اي حد من منسوبي المنتدى من الاقسام الثانية ( اقدام او ايادي او غيرهم ) >>> معليش فرصة تانية ان شاء الله


صراحة احنا مش فاضيين لحد وغير مسؤولين عن احد .. عيل من عيالنا يخطف عكاز ولا جهاز حركي ويجري بيه فاصل هيبرة احنا مش مسؤولين


هذا بالاضافة انهم ( جيرانا بالاقسام الثانية ) بيعملوا رحلات وشواطيء ويطنشونا ويقولوا ممنوع اصطحاب الاطفال خاصة الاوتيزم


طالما الامر كده وانتم ال بديتم ....


اذا .. مفيش داعي للاحراج .. بالعربي وعلى بلاطة >>> انسونا بالمشوار ده

تنبيه هام /

اي حد منهم بيحاول يعمل نفسه توحدي علشان يحضر الاجتماع والعشا طبعا ويتنكر ويرفرف او يمشي على صوابع رجليه برضه

حنكشفوه ويتقفش وحيكون شكله بااااايخ

 

[السيد عبدالعظيم]

رد: دعوة لليوم العالمي للتوعية بالتوحد

الله يجازيك خير يا كوكتيل طبيعي،
بس يا راجل لأ مش كده
الدعوة عامة لكل الناس
واطمن مفيش عشا الموضوع كله نواشف ومشروب
يا رب اشفي ابني واشفي كل اطفالنا

 

[ازميرالدا]

رد: دعوة لليوم العالمي للتوعية بالتوحد

بالتوفيق ان شاء الله
وفي انتظار اخبار ونتائج اليوم
ربنا معاكم

 

[السيد عبدالعظيم]

رد: دعوة لليوم العالمي للتوعية بالتوحد

السلام عليكم، الحمد لله تعالى تم اليوم على خير، وأود قبل أن أكتب ما تم به أن أسمع رأي من حضر اللقاء، ورأي من سمع عن اللقاء ممن حضروا،
مش معقول ولا حد حضر، ايه يا جماعة دي القاعة والحمد لله كانت مليانة

 

[توحدية]

رد: دعوة لليوم العالمي للتوعية بالتوحد

انا حضرت الاجتماع
وكان الساده المحاضرين ممتازين
وكان البرنامج منظم والحمد لله
اكثر حاجة عجبتني فقرة د هادي لانها كانت تعطي امل في علاج التوحد
انا مش عايزة حد يطبب علينا
وكمان كنت معجبه بالمدربين اللي اخدوا اولادنا منا يلعبوهم ويشغلوهم علشان نعرف نركز في اللقاء
احنا عايزين افكار ايجابية لعلاج المرض او حتى الوصول الي اقصي درجة تحسن
اما اللي زعلاني الاغنيه النكد اللي شغلتها ا دعاء
الضيف "لا اتذكر اسمه" اللي كان بيواسيني
بجد اللقاء كان جميل ما شاء الله
وفي الاخر جابوا فقرات ترفهيه لاطفالنا وكانوا مبسوطين

 

[السيد عبدالعظيم]

رد: دعوة لليوم العالمي للتوعية بالتوحد

السلام عليكم، شكرا للأخت توحدية على كتابة رأيك، الحمد لله أخيرا حد قال رأيه،
على فكرة الاغنية كانت مطلوبة ومقصودة في التوقيت ده لإعادة شد انتباه الناس ولزيادة الحماسة بتوضيح مكان الالم

عموما والحمد لله اليوم كان ممتع وكان بفضل الله تعالى منظم وخرج بشكل جميل،
وأكثر الكلمات التي سمعتها تعليقا على اليوم، أن الجميع خرج بطاقة إيجابية من اللقاء
وكانت أكثر المطالب هي تكرار اللقاء بدون إنتظار العام القادم
والحمد لله المحاضرين كانوا متنوعين إثنين أطباء تكلموا عن التقييم الطبي(د هادي هداية) وعن تعديل السلوك(د حنان المزاحي)
ومختصين تكلموا عن ما هو التوحد (د أشرف لطيف) واللغة عند الاطفال (أ ريم دويدار) وهمسات عن الأدوار والمهام (د دعاء عبداللطيف)
وأيضاُ كان موجود المدير التنفيدي لمديرية التربية والتعليم (أ سمير النيلي)
وتمت دعوة التليفزيون وبالفعل جاءت قناة الاسكندرية وصورت اللقاء وعملت لقاءات مع بعض الموجودين وتم عرض البرنامج (هنا الاسكندرية) يوم 4-4-2012
وتكلم مقدم البرنامج عن التوحد مقتبسا بعض الجمل من اللقاء
وفي اخر اليوم كان فقرة ترفيهية كوميدية للأطفال مسرح عرائس
وفي أثناء اللقاء كان مجموعة من الاخصائيين مع مجموعة من المتطوعين وأغلبهم طلبة بالشغل مع أطفالنا في أخر القاعة وقاموا بعمل مجموعة من الانشطة معهم يعني جلسات مجانية للأطفال خلال اللقاء
يا رب الموضوع يكمل ونزيد التوعية وتكون هناك نتائج
وبصراحة
الجميع كان حاسس ان اليوم يومه هو

ولمن يريد ان يسمع الاغنية المصودة في الكلام
هي اغنية دعني اسمع صوتك ل باسم صليبة
وهي عن طفل التوحد
اسمعوها بالله عليكم والبكاء ليس بمشكلة أحيانا يكون بداية العلاج وأول خطوة فيه

 

[ازميرالدا]

رد: دعوة لليوم العالمي للتوعية بالتوحد

شكرا اختي توحديه والاخ السيد عبد العظيم
علي موافاتنا بنتائج اليوم وموفقين باذن الله
كنا نريد ايضا استعراض النقاط او المعلومات اللي استفدتوها من اللقاءات سواء علي المستوي الطبي مع الدكتور هادي او من الاخصائيين

الاغنيه كما اذكر سبق ان طرحت في موضوع بالمنتدي للاخت ام دانيال

 

[توحدية]

رد: دعوة لليوم العالمي للتوعية بالتوحد

اتمني ان تنزل الفيديو الخاص باليوم حتى نعيد سماعه مرة اخري ومن لم يحضر يستفيد منه

 

[ام البراءه]

رد: دعوة لليوم العالمي للتوعية بالتوحد

كمان انا شفت في قناة المحور برنامج واحد من الناس عن اليوم العالمي للتوحد وكثير من الفنانين شاركوا فيه وطالب المذيع الحكومه الجديده ان تهتم بهذه الفئه وان يحرموا من اداء الخدمه في الجيش
وعن المصاعب التي واجهت اسرهم بفتح مدارس لهم وغيرها من الخدمات التي تسهل لهم ياريت الربيع العربي يكون فاتحه خير علينا كلنا قولوا يارب ​

 

[مارو]

رد: دعوة لليوم العالمي للتوعية بالتوحد

الحمدلله اليوم بجد كان مشرف جدا وكان اجمل بكتيييييييييير ما كنا متوقعيين احنا استفدنا جدا واولادنا استمتعوا جدا جدا واتمنى تكرار هدا اليوم على الاقل مرة شهريا لتعم الفائدة على الجميع وجزاكم الله كل خير

 

[سدرة]

رد: دعوة لليوم العالمي للتوعية بالتوحد

السلام عليكم، شكرا للأخت توحدية على كتابة رأيك، الحمد لله أخيرا حد قال رأيه،
على فكرة الاغنية كانت مطلوبة ومقصودة في التوقيت ده لإعادة شد انتباه الناس ولزيادة الحماسة بتوضيح مكان الالم

عموما والحمد لله اليوم كان ممتع وكان بفضل الله تعالى منظم وخرج بشكل جميل،
وأكثر الكلمات التي سمعتها تعليقا على اليوم، أن الجميع خرج بطاقة إيجابية من اللقاء
وكانت أكثر المطالب هي تكرار اللقاء بدون إنتظار العام القادم
والحمد لله المحاضرين كانوا متنوعين إثنين أطباء تكلموا عن التقييم الطبي(د هادي هداية) وعن تعديل السلوك(د حنان المزاحي)
ومختصين تكلموا عن ما هو التوحد (د أشرف لطيف) واللغة عند الاطفال (أ ريم دويدار) وهمسات عن الأدوار والمهام (د دعاء عبداللطيف)
وأيضاُ كان موجود المدير التنفيدي لمديرية التربية والتعليم (أ سمير النيلي)
وتمت دعوة التليفزيون وبالفعل جاءت قناة الاسكندرية وصورت اللقاء وعملت لقاءات مع بعض الموجودين وتم عرض البرنامج (هنا الاسكندرية) يوم 4-4-2012
وتكلم مقدم البرنامج عن التوحد مقتبسا بعض الجمل من اللقاء
وفي اخر اليوم كان فقرة ترفيهية كوميدية للأطفال مسرح عرائس
وفي أثناء اللقاء كان مجموعة من الاخصائيين مع مجموعة من المتطوعين وأغلبهم طلبة بالشغل مع أطفالنا في أخر القاعة وقاموا بعمل مجموعة من الانشطة معهم يعني جلسات مجانية للأطفال خلال اللقاء
يا رب الموضوع يكمل ونزيد التوعية وتكون هناك نتائج
وبصراحة
الجميع كان حاسس ان اليوم يومه هو

ولمن يريد ان يسمع الاغنية المصودة في الكلام
هي اغنية دعني اسمع صوتك ل باسم صليبة
وهي عن طفل التوحد
اسمعوها بالله عليكم والبكاء ليس بمشكلة أحيانا يكون بداية العلاج وأول خطوة فيه

جزاكم الله كل خير على هذا التخطيط والتنفيذ الرائعين نفع الله بكم وجعلكم قدوة لمن يرجو الفائدة والتوعية وندعوا الله ان يحظى أبناؤنا بأعلى مستويات التأهيل ويقر أعيننا بشفائهم
كما تفضلت أخلت أزمير ألدا الاغنية طرحتها الأخت ام دانيال وهي اكثر من رائعة واليكم رابط الموضوع
http://www.t7di.net/vb/showthread.php?t=51892

 

[السيد عبدالعظيم]

رد: دعوة لليوم العالمي للتوعية بالتوحد

السلام عليكم، أخيرا والحمد لله حصلت على السي دي الخاص بالاحتفال من التلفزيون
كنت عاوز اعرضه هو قبل ما اعرض فيديوهات اللقاء
ده جزء من البرنامج فيه الفقرة الخاصة باليوم
http://youtu.be/KyxxNS37WRU

 

[السيد عبدالعظيم]

رد: دعوة لليوم العالمي للتوعية بالتوحد

وكلمة الدكتورة دعاء عبداللطيف
http://youtu.be/HyLt8ZMDRNQ

 

[حروف الصمت]

رد: دعوة لليوم العالمي للتوعية بالتوحد

ماشاء الله عليكم وفقكم الله