دولة الشيك

[روان جمال]

السلام عليكم اشلونكم ان شاء الله بخير بس ممكن اسأل على المستشفيات الي بدولة الشيك لانه اخويه انضرب بطلقه وصار ضرر بالحبل الشوكي وهسه مايمشي وياريت اتفيدوني

 

[بنت التحدي]

الف سلامة على اخوك ياموو

واتمنى من باقي الاعضاء مساعدتك

تقديري
بنت التحدي

 

[إعصار المشاعر]

السلام عليكم ورحمة الله وبركاته
روان انيي شنو تردين بالضبط علاج طبيعي ام عملية في الجيك
ربنا يشفي اخيكي ومرضى المسلمين جميعا​

 

[العراقي المصاب]

السلام عليكم
اختي روان اني موجود بالتشيك الي هسه سنه وشهرين بس ممكن تكليلي شنو الي تريدي بالضبط واني حاظر لان حالي حال اخوج وحال هوايه من الاخوه العراقيين الي انظربو طلقات
اني مظروب ست طلقات وحده منهن لامست العمود الفقري ودا اتعالج هسه بمصح داركوف ابعد عن براغ اريع ساعات ونص تقريبا على حدود بولندا وسلوفاكيا وتبعد فينا عن المكان الي بيه اني ثلاث ساعات ونص
هنا نضام مصحات مو مستشفيات تره يعني فندق متكامل واكل اسلامي وتدريب من الثمانيه الصبح الى الثلاثه الظهر
عدا ايام السبت والاحد ويكند اي عطله عدهم
ارقه مصح هنا داركوف الي قريب على منطقه كبيره اسمها اوسترافا
مصح متكامل وغرف مريحه وكلشي هنا مريح وقريب حتى الصيدليه موجوده جوه بالطابق الاول والمطعم بالطابق الثاني الي يتصل بالبنايه على مكانات التمارين لان كل تمرين بمكان مختلف هنا اما الغرف فبال الطوابق من الرابع الى الثنعش طابق وبنايتين متصلات بالطابق الثاني
الحمد لله اني اول مجيت لداركوف جانت حالتي تعبانه كلش وممرضات عندي اربع وعشرين ساعه اما هسه اني وحدي حتى اروح التمارين وحدي الا الهم اجيب ممرضه حكت المشاوير اذا اريد اطلع او تجي تعدل اغراضي وبس
اما كل اموري مكظيها وحدي والاعتماد على الله وعلى نفسي وبس
عكس اول مجيت جنت كلش تعبان وجانت عندي قرحه فراش رحت منطقه هنا اسمها برنو سويت الها عمليه ورجعت لداركوف اتعالج
واي استفسار ثاني اني حاظر واذا ناوين تجون للتشيك اني اهيء الامور كلها الج لان اني قبل ما اجي هم جنت حاير واعرف حال الي بيه انتوا هسه لان عشته اني هم الى ان وصلت هنا
بيج خير وتدللين على اي شي بعد تريدي ومن ناحيه الاسعار هسه ارخص الى شهر الرابع لانه خارج الموسم هسه بس برد وثلوج حاليا
اخوج حمزه كهيه العامري