الحنين الى الماضي

[لولو دلعلع]

انا عزيمتي احلى​

في الآونه الاخيره الناس صاروا مايطلعون
ولا يجتمعون مع بعض كلهم مسكرين على انفسهم
بهالبيوت بين اربع جدران .. والسبب ؟؟؟
الحين راح نعرف

للأسف راحت أيام البساطه والجمعه
على قهوه وتمر وشاهي وكيك او نوع واحد حلى
واذا ماجتهدتي وتكلفتي في عزيمتك
طلعتي بخيله أو مو مقبوله عندهم
وينفشون راسهم على اساس هم المتميزات
الخطيرات .. اللي يعرفون كل شيئ

لما تفكرون بالعزيمه شوي ترا الهدف منها
الجمعه والسواليف اللي توسع الصدر
مو المغاير والمكايد والتنافس
يعني الناس مو ميتين جوع أو مايعرفون شي
او ماعمرهم شافوا شيء

لكن للأسف راح زمن أول
زمن البساطه والولفه والمحبه
من اول تدق الجاره ع الجاره وتجي بنفس اليوم
بدون ماتكلف على جارتها

والحين جاراتي وصديقاتي مايعلمون ع العزيمه
الا قبلها بأسبوع عشان يبدا الاجتهاد
والتكلف والمبالغه وعزميتي أنا احلى !
للأسف صار استقبال الناس صعب جدا في بيتك بهالزمن
لازم تسوين خرابيط كثيره

طبعا الناس طايحين اول ماتدخلين عصير معه حلى
او كابتشينو بعدين قهوه ومعها مية الف نوع
حلى وحلويات بعدين شاهي مع معجنات
ومقالي من كبه وسمبوسه و ..... الخ

بعدها عشا بوفيه مبالغ فيه من جميع الأصناف
طبعا غير التفنن في اشكال الصحون والمواعين والأكواب
يعني هالعزيمه كلها خساير في خساير
وبعدها الحرمه تسكر بيتها ولا فيه اجتماع الا بعد سنه

واللي اشوفه الحين جاراتي كل وحده قطعت العلاقه
او هربت عن طريق غير مباشر وسكرت على نفسها
وعيالها في البيت عشان ماتعزم احد
وتتكلف ولا احد يعزمها

والعلاقه صارت شبه منقطعه
بعد ماكنا على قلوب وحده ونضحك ونسولف
ونغير جو للأسف

اما الرجال ماشاءالله علاقتهم مستمره
ومافيها رسميات وماعندهم شي اسمه( انا عزيمتي احلى )
او مبالغات .. وموسعين صدورهم ويجتمعون
على دجاجه ورز بخاري او شاورما وبروستد وهم مبسوطين
الله يعين الحريم على انفسهم في الدنيا والاخره

مجرد فضفضه وحنين للماضي هذا الواقع ع الجرح انكتب

~~~~~~~~~~~~~~~~~~~~~~~~~~~~~~~~
مم راق لي
تحياتي


​

 

[مذهلة]

رد: الحنين الى الماضي

ما اجمل الماضي ... لكنه لن يرجع وسوف تضل ذكرياته الجميلة تراودنا بين حين واخر

والله يكون بعونا على متطلبات عصرنا الحديث


شكرا لولو على الموضوع الجميل​

 

[استراليا]

رد: الحنين الى الماضي

شكرا اخت لولو بارك الله فيك

 

[ألم الأمل]

رد: الحنين الى الماضي

فعلا هذا إلي حاصل في وقتنا الحالي
المظاهر طغت على البساطة والتواضع
فنجد إن عزائم هذي الأيام تكون للتفاخر والتباهي
وليس لتقريب القلوب وراحة النفوس !!

.شكرا على الموضوع لولو دلع

 

[لولو دلعلع]

رد: الحنين الى الماضي

لكم جزيل الشكر ع مروركم
مع احترامي لكم ...