مركز لتدريب بطريقة aba بالكويت

[ام التوحد]

السلام عليكم ...
اليوم عندي لكم بشارة لقيت مركز اسمه abc
وهو اختصار لـ applied behavior center
هذا موقعهم http://www.abckuwait.com/index.html
ارقامهم موجوده بالموقع انا كلمتهم وارسلوا لي ايميل في بيانات لازم ارسلها لهم وبعدين يحددون موعد للمقابله وفي امكانيه جلسات بالبيت ولازم على الاقل جلسة بالمركز وهم فاتحين من شهر مارس على كلام الموظفة وعندهم دكتور امريكي يجي زياره مره بالشهر من الامارات
وان شاء الله خير ...

 

[رحمه ربي]

رد: مركز لتدريب بطريقة aba بالكويت

مشكووره يا أم عبدالله

بس علي ما أذكر أهو مركز أمريكي وكل اللي فيه أجانب لان أذكر مره أن الدكتوره عبير أعطتني

أوراق عن مركز أمريكي حتي كرتهم عندي توني تذكرته لما قلتي ان عندهم دكتور أمريكي وكنت بسجل فيصل فيه بس الظروف ما سمحت

بحاول أدق عليهم أذا رديت أن شاء الله

 

[سمر خالد]

رد: مركز لتدريب بطريقة aba بالكويت

الغالية أم عبدالله​

جزاكي الله كل الخير علي المعلومة و سامحوني علي التقصير لاني علمت عن وجود المركز من شهر مارس الماضي و لكن صدقيني لا اعرف لماذا لم اذكر ذلك في المنتدي و انا الحريصة علي نقل كل خبر قد يكون مفيدا لاطفالنا و الاهالي​

سامحوني مجددا .​

الغالية ام فيصل ، هو ليس مركز امريكي لان العاملين هناك من جنسيات متعدده و هناك الكثير من الاخصائيين العرب بالاضافة الي الاجانب و لكن الادارة كلها من الجنسية الكندية .​

حضرت محاضرة اقامها المركز في شهر مارس الماضي و ايضا قمت بزيارته من باب التعرف علي اول مركز aba في الكويت و هو مركز ممتاز و مؤهل و معد بشكل رائع .​

بالنسبة لاسعاره يطبقون بالضبط التسعيرة المتبعة في كندا بحيث ان سعر الساعة 15 دينار و 22 دينار لساعة الاخصائي بالاضافة الي التقييم الاولي 250 دينار يحسب من مصاريف اول شهر ، و الجدير بالذكر ان التعامل مع المركز هو عبارة التزام شهري من قبل الاهل بالجلسات و لا يمكن طلب جلسات فردية .​

سامحوني مرة اخري علي التقصير بس اكيد الاخوات ما قصروا .​

تحياتي​

 

[ام التوحد]

رد: مركز لتدريب بطريقة aba بالكويت

حبيبتي ام خالد ماقصرتي كلنا نساعد بعض
تدرون انا اول ما رجعت من مصر كلمت اخصائيه عندهم اسمها هيذر كنت ابيها تجي البيت تدرس ولدي بس هي قالت انهم راح يفتحون مركز وانها بطلت تعطي دروس خاصه وارسلت لي ايميل عن ال aba انا نسيت الموضوع وقلت لما يفتح المركز اكيد راح اسمع عنه وامس بس لما كلمت الدكتوره بالتليفون قالت لي عنه انا سألت عن اسعارهم وقالت الموظفه الجلسه بحدود 17 دينار واذا جلسات مكثفه راح يكلف
ام خالد ما جربتي كلش ولا جلسه حق خلودي
تدرين ولدي قبل رمضان طرد استاذ اسلام (فضحني وفشلني) مع انه ما قصر معاه عبود الحين حتى العنوان يعرفه ماشاء الله عليه بس مرات مادري تتغير اهتماماته(تعرفون طريقة اسلام في التعليم دفتر والوان ويرسم ولدي مسوي نسخه عن كتابه مادري زين والا شين) وحاليا الاخ بس يروح النادي يسبح ويلعب ويرجع البيت بدون دراسه ( هذي تكاليف 180 دينار على الفاضي ) وانا الحين ثقيله ادرسه بس مو بانتظام وبعد هوب انا طلعته منها ولغاية الان ماسجلته في مدرسه جديده يعني محتاج لنظام مثل اول انا بجرب واذا التكاليف فوق الطاقه الشكوى لله :abu-asail20 (28):
دزيت لهم المعلومات وناطره منهم موعد والله كريم
بعد ترى شي زين الناس صار عندها وعي والاطفال الصغار مستقبلهم بأذن الله فيه امل تكامل سمعي والحين aba
الله يعزج يالكويت
وبعد قبل رمضان سويت له تحاليل عند البشر ان شاء الله مو خساره 370 دينار وغير السفر وتكاليفه لو نحط الفلوس في مكان واحد ونعلمهم احسن واضمن حق مستقبلهم والا شرايكم تعرفون في وحده اسمها مريم الراشدي قطريه يمكن او عمانيه ولدها توحد راحت كندا وعلمته بالـaba ورجعت بعد فتره ولدها يتكلم بس انجليزي انا حضرت لها ورشة في الخرافي

 

[قهر]

رد: مركز لتدريب بطريقة aba بالكويت

بالتوفيق جميعا

شدو حيلكم نبا نسمع اخبار طيبة حاسه انو الفرج قريب يارب

 

[ام عموري الغالي]

رد: مركز لتدريب بطريقة aba بالكويت

الله يبشركم بالخير يارب
اختي ام التوحد بانتظارك تخبرينا عن التكلفة وكيفية النظام
هل هو دوام كامل ام مجرد جلسات للي نعرفها لاني اعرف ان نظام aba لازم يكون 40 ساعة بالاسبوع حتى يحقق نتائج جيدة
سؤال اخر لو سمحتي ما اسباب سحب ابنك من مدرسة هوب هل هي اسباب متعلقة بالمدرسة ام اسباب خاصة
سامحني لسؤالي لاني كمان حاطة ابني هناك وتعرفي قسطهم عالي وخايفة يكون كلو على الفاضي

 

[مسك]

رد: مركز لتدريب بطريقة aba بالكويت

الله يعطيك العافيه ام التوحد شيء طيب هذا الخبر جدا مفرح الله يبشرك بالخير

 

[ام التوحد]

رد: مركز لتدريب بطريقة aba بالكويت

الله يبشركم بالخير يارب
اختي ام التوحد بانتظارك تخبرينا عن التكلفة وكيفية النظام
هل هو دوام كامل ام مجرد جلسات للي نعرفها لاني اعرف ان نظام aba لازم يكون 40 ساعة بالاسبوع حتى يحقق نتائج جيدة
سؤال اخر لو سمحتي ما اسباب سحب ابنك من مدرسة هوب هل هي اسباب متعلقة بالمدرسة ام اسباب خاصة
سامحني لسؤالي لاني كمان حاطة ابني هناك وتعرفي قسطهم عالي وخايفة يكون كلو على الفاضي

ام عموري انتي عندنا بالكويت :m0dy_net-792:
اعتقد انه جلسات مو دوام كامل لما اروح لهم اقول لكم
بالنسبه حق هوب ولدي فيها من اول سنه فتحوها من 5 سنوات بس كافي
بعد نفس المنهج والاسلوب مافي تغيير ابي اغير له المدرسه بس للحين ما لقيت المدارس اللي ابيها فل ماكو مكان

 

[ام التوحد]

رد: مركز لتدريب بطريقة aba بالكويت

الله يعطيك العافيه ام التوحد شيء طيب هذا الخبر جدا مفرح الله يبشرك بالخير

يعافيج اختي مسك

 

[طاهره]

رد: مركز لتدريب بطريقة aba بالكويت

مبروك عليكم اهل كويت
ماعندكم فكره اذا بيفتحو في مسقط اوفي شي اسمه

aba

 

[سمر خالد]

رد: مركز لتدريب بطريقة aba بالكويت

حبيبتي ام خالد ماقصرتي كلنا نساعد بعض

تدرون انا اول ما رجعت من مصر كلمت اخصائيه عندهم اسمها هيذر كنت ابيها تجي البيت تدرس ولدي بس هي قالت انهم راح يفتحون مركز وانها بطلت تعطي دروس خاصه وارسلت لي ايميل عن ال aba انا نسيت الموضوع وقلت لما يفتح المركز اكيد راح اسمع عنه وامس بس لما كلمت الدكتوره بالتليفون قالت لي عنه انا سألت عن اسعارهم وقالت الموظفه الجلسه بحدود 17 دينار واذا جلسات مكثفه راح يكلف
ام خالد ما جربتي كلش ولا جلسه حق خلودي
تدرين ولدي قبل رمضان طرد استاذ اسلام (فضحني وفشلني) مع انه ما قصر معاه عبود الحين حتى العنوان يعرفه ماشاء الله عليه بس مرات مادري تتغير اهتماماته(تعرفون طريقة اسلام في التعليم دفتر والوان ويرسم ولدي مسوي نسخه عن كتابه مادري زين والا شين) وحاليا الاخ بس يروح النادي يسبح ويلعب ويرجع البيت بدون دراسه ( هذي تكاليف 180 دينار على الفاضي ) وانا الحين ثقيله ادرسه بس مو بانتظام وبعد هوب انا طلعته منها ولغاية الان ماسجلته في مدرسه جديده يعني محتاج لنظام مثل اول انا بجرب واذا التكاليف فوق الطاقه الشكوى لله :abu-asail20 (28):
دزيت لهم المعلومات وناطره منهم موعد والله كريم
بعد ترى شي زين الناس صار عندها وعي والاطفال الصغار مستقبلهم بأذن الله فيه امل تكامل سمعي والحين aba
الله يعزج يالكويت
وبعد قبل رمضان سويت له تحاليل عند البشر ان شاء الله مو خساره 370 دينار وغير السفر وتكاليفه لو نحط الفلوس في مكان واحد ونعلمهم احسن واضمن حق مستقبلهم والا شرايكم تعرفون في وحده اسمها مريم الراشدي قطريه يمكن او عمانيه ولدها توحد راحت كندا وعلمته بالـaba ورجعت بعد فتره ولدها يتكلم بس انجليزي انا حضرت لها ورشة في الخرافي

الغالية ام عبدالله

المركز و كما قلت هو عبارة عن التزام شهري و ليش جلسات متفرقة بمعني ان يلتزم الطفل بعدد من الجلسات في الاسبوع و الدفع لآخر الشهر ، انا زر المركز واستفسرت عن الاسعار و هي كالتالي

package 1
10 ساعات في الاسبوع - 8 ساعات تدريب للطفل و ساعتين مقابلة مع الاخصائي اسبوعيا
التكلفة الشهرية 740 دينار كويتي

package 2
20 ساعة في الاسبوع - 16 ساعة تدريبية مع الطفل و 4 ساعات مناقشة الحالة مع الاخصائي اسبوعيا
التكلفة الشهرية 1450 دينار كويتي

package 3
30 ساعة في الاسبوع - 24 ساعة تدريبية للطفل و 6 ساعات مقابلة مع الاخصائي لمناقشة الحالة اسبوعيا
التكلفة الشهرية 2160 دينار كويتي

package 4
40 ساعة في الاسبوع - 32 ساعة تدريبية للطفل و 8 ساعات مقابلة مع الاخصائي اسبوعيا
التكلفة الشهرية 2870 دينار كويتي

طبعا الاسعار كانت صدمة لي و لكن هذه هي اسعار مراكز الABA في الخارج

و لكن غاليتي ام عبدالله لدي خبر قد يكون سار بالنسبة لكي و لأم فيصل و الاخوات الكويتيات و لكن لم اتأكد منه بعد و لكنه سيهمك و هو ان المركز يسعي الآن للانضمام الي المجلس الاعلي للمعاقين و اذا تم ذلك سيساعدك ذلك ماديا بشكل كبير .:m0dy_net-754:

و اكرر ان المركز لا يقبل الجلسات الفردية بل الالتزام الشهري و فقط

بس زعلتيني علي استاذ اسلام ليش عبودي عمل هيك :abu-asail20 (17):

تحياتي



​

 

[سمر خالد]

رد: مركز لتدريب بطريقة aba بالكويت

بعد ترى شي زين الناس صار عندها وعي والاطفال الصغار مستقبلهم بأذن الله فيه امل تكامل سمعي والحين aba
الله يعزج يالكويت


تعقيبا علي كلامك يا أم عبدالله ، بالاضافة للتكامل السمعي و مركز ال ABA عندنا و الحمدلله مركز للاكسجين المضغوط (مركز الشيخة بدرية اذا سمعتي عنه في الصباح )و لكنه للاسف لم يفتح المجال لاطفال التوحد و لكن علي الاقل موجود و الامل يضل موجود في ان يرق قلب اصحاب المركز لاستقبال اطفالنا بدلا من السفر و الغلبة .

و كمان اكتشف من كم يوم وجود عيادة في الكويت لديها خيمة الاكسجين المضغوط الفردية و الجماعية و رأيت اعلانا لها في الجريدة و يتعاملون مع اطفال توحد و لكن لن تصدقي سعر جلسة الاكسجين الواحدة !!!!!! سعر الجلسة الواحدة 70 دينار كويتي :abu-asail20 (17):

ليش مو عارفة

تحياتي ​

 

[ام التوحد]

رد: مركز لتدريب بطريقة aba بالكويت

سمر صدمتيني باسعارهم كان خلتيني باحلامي الورديه اني لقيت حل لدراسة ولدي:m0dy_net-779:... ما يصير نص باكيج ههههه
اعرف مركز الشيخه بدريه وهو للعسكرين فقط
العياده الثانيه افتكر انها بالجابريه صح جدا غالي وبعدين الاكسجين انا مخليته اخر شي لان ما اشوف نتايج مشجعه كثير اللي عملوا اكسجين لعيالهم وما شافوا نتيجه
وكمان سمعت ان abc ممكن يكون تحت مظلة مجلس المعاقين بس تخيلي شلون راح يكون التسجيل عندهم او العدد او شروط القبول انا الحين مو لاقيه مدرسه لابني والله احتمال هو قاعد بالبيت السنه القادمه
بالنسبه لاستاذ اسلام انا بموت قهر بس ولدي عنيد حاليا انا اخوض معارك مع بطنه مسكين ومرات يصير عصبي ما الومه ماندري شلون قاعد يعاني واحنا بس نبيه يدرس وياكل ونمشيه على كيفنا خليه على راحته مرات هو يطلبه بنفسه بس حاليا عاطل عن الدراسه حتى اشعار اخر:m0dy_net-821:
شلون بقول لابو عبدالله عن التكاليف :m0dy_net-795:

 

[ام عموري الغالي]

رد: مركز لتدريب بطريقة aba بالكويت

ههههههههههههه الله يبشرك بالخير ياسمر شكلي ولاحتى ربع باكيج يا ام التوحد ولاحتى راح احاول افتح الموضوع مع ابو عموري :m0dy_net-794:
والله العظيم للي يحط هالاسعار مايعرف هالاطفال عندهم دكتور وادوية واكل حمية وعندهم اخوات غيرهم
شكلي راح ظل على هوب طلعت رحمة جنبهم لحد ما نشوف البديل المناسب والله المستعان

 

[وبشر الصابرين]

رد: مركز لتدريب بطريقة aba بالكويت

يافرحتي اول ماقريت الخبر... بس الاسعار كانت مثل السلك الشائك

يارب سهل امر عيالنا وشافيهم... بس بغيت استفسر بالنسبة للتكامل السمعي وين اقدر اسويه

وهل لازم اسوي لابني والا هناك اعراض؟؟؟

 

[ام التوحد]

رد: مركز لتدريب بطريقة aba بالكويت

يافرحتي اول ماقريت الخبر... بس الاسعار كانت مثل السلك الشائك

يارب سهل امر عيالنا وشافيهم... بس بغيت استفسر بالنسبة للتكامل السمعي وين اقدر اسويه

وهل لازم اسوي لابني والا هناك اعراض؟؟؟

والله حتى انا كنت طايره من الفرحه والحين حيرة وتفكير وحسابات مو راضيه تضبط ... الله كريم
التكامل السمعي شوفي سمر هي اللي تجمع الاسامي وتقدرين تسوينه لولدج باذن الله

 

[ام التوحد]

رد: مركز لتدريب بطريقة aba بالكويت

بالتوفيق جميعا

شدو حيلكم نبا نسمع اخبار طيبة حاسه انو الفرج قريب يارب

شكرا حبيبتي للتشجيع بأذن الله انا بجربهم وراح اعلمكم بس ادعوا لولدي انه يستجيب لانه مزاجي وصعب وبعد عمره مو صغير

 

[مسك]

رد: مركز لتدريب بطريقة aba بالكويت

اهم شيء في نتائج يعني المركز زين ولا لأ في احد مجربه طيب ما يصير نقوا نبي تقييم للحاله ونشوف النتائج

 

[ام التوحد]

رد: مركز لتدريب بطريقة aba بالكويت

موعدنا اليوم بأذن الله
دعواتكم تضبط حساباتي معاهم
وان شاء الله خير

 

[الغلا خالد]

رد: مركز لتدريب بطريقة aba بالكويت

الله يوفقكم يارب..
وفيه فايده منه ..
وين صاير مركز التكامل السمعي..
واتمنى التوفيق لجميع اطفالنا..