مسلسل سوالف دموع تبتسم

[دموع تبتسم]

مسلسل سوالف دموع تبتسم ..

كما تعودتم من دموع تبتسم.. على الشقاوة والمرح ..
اليوم جايبة لكم مسلسل وكل حلقة بستلم فيها مجموعة اعضاء ومشرفين .. بقالب كوميدي مميز ..

الحلقة الاولى ..

دموع تبتسم متملله اليوم ... ومن زود مللها تمت رايحة جاية جنب الدريشة ..(النافده)
(( تراقب الفريج )) شوي الا امال شايلة في ايدها صحن ورايحة بيت ام حسام ..

دموع تبتسم تكلم نفسها : اني بوكف(بوقف) الحين ما بتزرزح(اتحرك) بشوف امال تجيب ليي صحن مفل(مثل) ما ودت لام حسام .. الا صدك(الصدق) هالمكشوعه(ماادري شنو معناتها) امال ويش موديه(شنو في الصحن) في الصحن ؟؟!!


و دموع تبتسم تكلم نفسها امال طلعت من بيت ام حسام .. وهي رايحة بيتهم شافت دموع تبتسم وهي واقفة في الدريشة ..(النافذه)

امال تكلم نفسها واهي راجعه بيتهم : اوهو هادي كله مرتزه(واقف) في الدريشة(النافذه) وتتطلل الحين اكيد شافتني واني اودي الصحن لام حسام وبتقول لاويش(ليش) ما وديت ليها .. افففففففف بروح احط ليها ادنات

وراحت امال وحطت شوية قيمات في صحن وراحت ودته دموع تبتسم ..
دشت(دخلت) امال بيت دموع تبتسم << خبركم عجايز سيدة درعمت(ماادري شنو ماعنتها اسمعها من امي العوده اتقولها بس ماادري شنو يعني معناتها) بدون ما تطق الباب

امال : ماميش(مافي ) احد ؟؟
طلعت دموع تبتسم من المطبخ الا تقول : امبلا اني هني حياش حياش ..
امال : شوفي ياخلف جبدي(يابعد عمري) اني اليوم مسويه قيمات الجهال خاطرهم في قيمات وسويت ليهم ورفعت(شالت) لش .. هاش تفضلي ..
سحبت دموع تبتسم الصحن من ايد امال.. دموع تبتسم :اهووووو زاد فضلش .. الا ام حسام
بعد مودية ليها كيمات ؟؟
امال : لا يختي مسوية ليها هريسة موصتني عليها من زمان وصحنها عندي من رمضان الا طاف قلت مره وحده اودي هريستها واطلع صحنها من دمتي ..
دموع تبتسم : اي احنا محنا رفكانش(صديقاتج) عشان تجيبين لينا هريس .. الهريس تودينه لبياسرش(ماادري شنو معناتها) واني تجيبيني ليي الكيمات المحزر(مادري شنو بعد) حكى (حقووو)ولادي يمصمصون الدبس الا فيه ويفلتونه .. ولا وعفر(يمكن) دبسش مال الكواطي(العلب) الا ما نطيكه(لامانحبه) .. هداك الكواطي(العلب) الخضران الا مرسوم عليهم نخله ..
امال: يو دموع تبتسم الناس يقولون رحم الله من ذكرني ولا حقرني وانتين عشان اتنغصت(شلت ) عليش بهالقيماتتين مطلعتني من ستر الله ..
دموع تبتسم اني اكول(اقول) الصدك[/COLOR](الصدق) لو كلمة الحك فكيلة(ثقيلة) هالايام ؟؟
امال : اني بقوم دموع تبتسم بروح فطوري على الفرن لا يحترق << تبي تفك روحها من لسان دموع تبتسم ..

دموع تبتسم : الله وياش .. << نايبة(بل) تبي الفكة من المرة
امال : يالله مع السلامة ..

طلعت امال .. وردت(رجعت) دموع تبتسم تدور(تتجه) صوب(اتجه) الدريشة(النافذه) وتدور ليها ناس من الفريج(الحي) تاذيهم مثل ما ادت امال ..


والى اللقاء في حلقة قادمة ونستلم اعضاء ومشرفين جدد

تحياتي القلبية
دموع تبتسم

 

[تناهيد]

موضوع خفيف وجميل
في انتظار سوالفك من باقي الاعضاء
تقبلي تحياتي اختي دموع تبتسم

 

[المحبة لدينها]

موضوع حلووووووو و مشوق

تسلم يمناك حبيبتي دموع تبتسم

ونحن في انتظار الحلقات الجديده

يعطيك الف عافيه

 

[امال]

دموع تبتسم يعطيك العافية على الموضوع

والله استمتعت بالحلقة الاولى

وننتظر حلقاتك الجديدة وباقي الاعضاء

 

[دموع تبتسم]

الحلقة الثانية

دموع تبتسم اليوم قاعدة تتصفح جرايد ومجلات وهي تتحلطم ..

دموع تبتسم: ايه اني لو متعلمة ليي حرفين حك اكرى هالشخابيط .. جان مو احسن ليي ..

وهي قاعدة جدي تتحلطم الا داشة ألم الأمل..

ألم الأمل :شحوالش دموع تبتسم ؟؟
دموع تبتسم : اي احوال ؟؟ اني هني منكهره ومتملله ..
ألم الأمل: يو ياختي ويش اللي قاهرنش ..
دموع تبتسم : كاعدة اكلب في هالمجلات ولاني عارفة ويش صاير .. ما ميش الا اطالع الصور بس..
ألم الأمل: ولا ويش ما تخلين بتش تقراهم لش .. اني مثلش جدي قبل .. تالي رحت روعة السماء يقولون حاطة ليها معلم .. وتعلمت شوية اتهجى .. روحي ليها انتين بعد ..
دموع تبتسم: تعلم زين يعني ؟؟!!
ألم الأمل: اي اقول لش قمت اعرف الهجه ..
دموع تبتسم: عجل بروح ليها باجر ..

شوي الا جاي ولد ألم الأمل: اماه الحقي اكو ابويي يبيش ..

ألم الأمل: بل الله يستر .. عجل دموع تبتسم اشوفش في المعلم .. يالله مع السلامة ..
دموع تبتسم: الله يسلمش ..

طلعت ألم الأمل.. وقامت دموع تبتسم تفكر وتخطط .. تجيبها فكرة وتوديها فكرة .. تالي لبست دفتها وراحت بيت روعة السماء..

دموع تبتسم : السلام عليكم .. شحوالش عاشقة ..
روعة السماء: عليكم السلام .. حياش الله دموع تبتسم .. حياش تفضلي ..
بحرانية : زاد فضلش .. يقولون يالمكشوعه مسوية لش معلم ..
روعة السماء: دموع تبتسم ؟؟ حق ويش اتقولين ليي مكشوعة ؟؟
دموع تبتسم : الا اتكشمر وياش ..
روعة السماء: لا دموع تبتسم قشمرتش هاذي ثقيلة عاد ..
دموع تبتسم : مسوية روحش تزعلين عاد .. اني امباش اتعلميني هجة وكرآن وامبى اصير احسن من ألم الأمل روعة السماء تقول في قلبها : اني دقيقتين ولين قعدتين ويايي ما تسوين فيي سوايا مو بعد اعلمش وكل يوم ترتزين في وجهي ..

ظلت روعة السماء ساكته وما ردت على دموع تيتسم موافقة تعلمها والا لا

دموع تبتسم : اشوفش سكتين يعني .. بلعتين لسانش ؟؟
روعة السماء: ويش اقول لش دموع تبتسم بس اني الحين مو فاضية .. وامبي اخلص بس من النسوان اللي عندي وما بعلم بعد .. رجلي مو راضي اعلم ..
دموع تبتسم: ول ول ول ول صدك عيارة .. كولي ما بعلمش وفجينا لا تجدبين ولا تهرين عليي وتكولين رجلش حجي ما كاله ..

روعة السماء: على راحتش دموع تيتسم بس اني ما بقدر اعلمش ..

عصبت دموع تبتسم وطلعت من بيت روعة السماء حتى مع السلامة ما قالت ..

قامت دموع تبتسم تفكر تفكر ويش تسوي .. تبي تتعلم تقرى وتكتب وروعة السماء ما تبي تعلمها
اخر شي .. قررت دموع تروح محو الامية ..

وفعلا سجلت دموع تبتسم في محو الامية .. وفي اول يوم داومت ..
اول حصة كان عندها عربي .. وكان درسهم عن عامر في المدرسة .. وكلما قالت المدرسة دخل عامر الصف .. قامت دموع تبتسم وغطت وجهها .. ويوم خلصوا الدرس سالتها المدرسة وش فهمتي من الدرس ..

دموع تبتسم : واحنا مدانا نتعلم وهالعامر كلحين وخرط في الصف ؟؟؟

طق جرس نهاية الحصة الاولى .. وابتدت الحصة الثانية .. حصة الحساب ..

كانت المدرسة تشرح عن الارقام والزائد والناقص واليساوي .. والمدرسة تشرح ما شافت الا دموع تبتسم غطت وجهها وقامت تصيح ..

المدرسة : بحرانية ويش فيش ؟؟
دموع تبتسم: الاحدعش يمعلمه الاحدعش ..
المدرسة : ويش فيها الاحدعش ؟؟
دموع تبتسم : ضكروني بعساكيل هلالوه الله يرحمه ..

خلصت دموع تبتسم دروسها ورجعت البيت ..
وقررت ما تروح المدرسة مره ثانية .. وبتترك المدرسة لعامر يدخل الصف ويطلع على كيفه


انتهت حلقتنا لليوم .. انتظرونا في الحلقة الثالثة ..
مع خالص تحياتي

 

[امال]

هههههههههههههه
الله يعطيك العافية اختي

 

[ألم الأمل]

​

دموع تبتسم ..أولا_ مشكورة على الأسلوب المميز في سرد الحوار التحاوري ​

الذي يهدف إلى المتعة والأبتسامة.​

ثانيا_ لم أكن أعتقد أن أكون من ضمن حواراتك وفي هذا الوقت.​

ثالثا_ الله يسامحك حتى الزوار يعرفون إني لست بنتا..بس إنتي​

مصرة على موقفك.. وردودي تثبت ذلك.!!!​

رابعا_ في الحوارات القادمة ردي لي الأضرار المعنوية والنفسية​

والشخصية..وبنشوف يمكن الأضرار المادية نسامحك عليها.​

 

[دموع تبتسم]

تسلممون أخوانى واخواتى لهذه اراي
بإنتظــــــار جديــــــدكـم المتميــــــز دومــــاً
وجـــزاكــم اللـــه خيــر الجـــزاء ووفقنـــا وإيــاكــم للخيـــر
ورحــم اللــــــه والــديــكـم المختلف واخترم كل واحد ووحده رايها او رايك ة
مـوفـقيـن
تحياتي

ان شاء الله قريب احط ليكم حلقة 2


تحياتي