قربتي تولدي تعالي اتعلمي معايا تحطي ايه في شنطه الولاده

[حنونة مصر]

ازيكو يا كل الحوامل
​

لاحظت ان موضوع شنطه الولاده ده شاغل امهات كتير خصوصا اللي اول مره تولد

فقولت اعمل الموضوع ده علشان يكون مرجع لكل واحده رايحه تولد و ده نتيجه خبرتي في ولاداتي الاتنين و وولاداه اختي يعني متخافوش متجرب

ملحوظه:- انت لازم تعملي شنطتين مش شنطه واحده . شنطه ليكي و شنطه للبيبي
و محدش يقولي هعتل هم الشيل . انت مش هتشيلي حاجه طبعا هتكوني بعربيه زوجك او احد اقاربقك او اكيد هيكون في تاكسي مستنيكي تحت البيت

موضوع الشنطتين ده هيسهل عليكي و علي مامتك او حماتك اي كان الرفيق اللي معاكي حاجات كتير و هتكون الشنط منظمه اكتر

اولا:- شنطه الام

* جلابيه واسعه و تكون بزراير من عند الصدر علشان الرضاعه و يفضل يكونو جلبيتين احتياطي
* روب سواء صيفي او شتوي حسب الشهر اللي هتولدي فيه
* لو انت مش حابه تروحي البيت بالجلابيه و بالروب ممكن تروحي بلبس الحمل اللي روحتي بيه المستشفي
* لو شتاء يفضل تاخدي معاكي 2 بادي واسع و 2 بنطلون واسع تلبسيهم تحت الجلابيه علشان بتكوني بردانه اوي

* شبشب
* مش اقل من 4 اندرات ممكن مستخدمهمش كلهم مش مشكله المشكله لو احتاجتي و ملقتيش

* فوطه و يفضل تكون كبيره او بشكير علشان لما تستحمي طبعا
* طبعا اوعي تنسي الفوط الصحيه هاتي معاكي كيس فوط من الحجم الكبير ولو الشنطه صغيره حطي 4 او 5 فوط في كيس و حطيهم في الشنطه
*و طبعا احنا والدين اه بس احنا مزز بردو ولا ايه؟

هتحطي معاكي كيس من بتوع المكياج فيه ايه بقا يا سيتي . المشط و توكه بس كده و كفايه كده علشان محدش يحسدك و انت مروحه

* مفيش مانع من شويه عصائر

كده يا امهات خلصنا شنطه الام

ثانيا :- شنطه البيبي

* لا يقل عن 3 او 4 اطقم خارجيه سواء هتلبسي جلابيه او سالوبيت براحتك بس راعي العدد
* عدد 3 طقم داخلي سواء شتوي ( فانله حماله + فانله نصف كم + فانله كم) او صيفي 3 فانله حماله بكباسين من تحت او لو مش بكبا سين هاتي 3 اندر مع الفلنات ولو هتلبسي جلابيه اوعي تنسي البنطلون سواء شتاء او صيف بردو احتياطي مش اقل من 2
* 2 شراب يفضل القطن طبعا
* طاقيه بيبي يفضل القطن ايضا ( مش شرط تستخدميها بس خديها علشان الشتاء او التكيف في الصيف)
* 4 او 5 حفاضات
* الببرونه و التاتينه و اعشاب لو انت حابه تعطي اعشاب من اول يوم
* كيس قطن و سبرتو ابيض . في سبرتو بيترش تحفه و سهل الاستخدام علشان السره
* لا يقل عن 4 بفتات علشان ميبهدلش هدومه علشان الطفل اول ما بيتولد بيدوله جلوكوز بسرنجه و عادتا بيدلق كله علي هدومه

* جوانتي في الشتاء و ممكن بردو متستخدمهوش لو الاكمام طويله
* لو انت حامل في بنت اوعي تنسي الحلق الطبي علشان الممرضه تخرم ودنها وترحي بيها مزه ولا هي ملهاش نفس ؟

* وايبس (مناديل مبلله) و علبه مناديل
* زجاجه شامبو جونسون صغيره ( بيبي اويل و بدره تلك بس احتمال متستخدمهمش)
* ركزي معايا اوي في النقطه ده اخر حاجه هتحطيها في الشنطه ولازم تكون علي وش الشنطه
( اقعدي علي السرير و اعملي اللي هقولك عليه هتجيبي البشكير اللي هيتنشف فيه البيبي اول مل يتولد

و تفرديه علي السرير و تجيبي البطانيه لو شتاء تفرديها عليه و بعد كده تجيبي الكفرته وبردو تفرديها عليه و بعدين السالوبيت او الجلابيه براحتك و بعدين البنطلون و بعدين الفانله بكم وبعدين الفانله النصف كم و بعدين الفانله الحماله و بعدين الحفاضه بنفس الترترتيب اللي انا قلت عليه بس يا سيتي و تمسكي كل ده مع بعض تلفيه لفه كده اكنه بيبي اهو تصبيره عبال ماتشوفي الامر بتاعك

هتساليني و انا اعمل كده ليه

هقولك علشان لما تروحي المستشفي طبعا بتكوني مرتبكه و كمان محدش بيبقي عارف الدقيقه بالظبط اللي هيولد فيها فاول ما الممرضه تقول هاتو حاجات البيبي محدش يبهدلك الشنطه و يفضل يجيب اندر من تحت و سالوبيت من فوق و ينسو حاجه لا احنا فتوكات منظمين و نظاف اول ما توصلي المستشفي او حتي في البيت هتوري اللفه ده لماما او اختك او جوزك و تفهميهم انهم يدوها للمرضه لما تدخلي العمليات

الممرضه طبعا هتاخد البشكير من علي الوش و تنشف البيبي و تلفه وتفتح اللفه هتلاقي كل اللي هتحتاجه بنفس الترتيب اللي هتلبس بيه .

بس يا امهات انا خلصت كده
​

منقوووووووووووول​