السلام عليكم ورحمة الله وبركاته
أخيرا والحمد لله عرضت بنتى على الدكتور يوم الثلاثاء الماضى
بإختصار كانت نتيجة الزيارة الأولى إن الدكتور شاف إن عندها سمات توحد وليس توحد بصورته الكاملة وخاصة إن فى مصر مش بيشخصوا التوحد إلا بعد 3 سنين بس هو قال إننا منقدرش ننكر إن هى عندها سمات توحد .. بس هو طلب إشاعة مقطعية للمخ وكمان رسم مخ لأنها عندها سنة ونص و متأخرة فى المشى لحد دلوقتى بصورة غير طبيعية شوية
بس إللى لاحظته إن الدكتور مش مقتنع بتطبيق الحمية أو حتى بالتحاليل إللى بتتعمل علشان المعادن والحاجات دى وأغلب أسبابه إنها مش بتتعمل فى مصر وصعبة ومكلفة وسألته هل المشكلة فى إنها صعبة ومكلفة ولا هى مش مفيدة .. فقالى مش مفيدة بالدرجة إللى الناس متخيلنها وكمان بالنسبة للحمية مش بيعمل بيها .. وقال لما أشوف الإشاعات هنكمل كلامنا
المهم عملنا الأشعة المقطعية وإتضح فيها المفاجأة إن فى المخ كيس ماية حجمة متوسط فى آخر الفص الأيسر من المخ مع وجود ضمور بسيط جدااااا فى جزء فى المخ فى الأعلى فى المكان المسئول عن تطور الحركة إنما رسم المخ الحمد لله كويس .. طبعا انا إتصدمت وقتها وكنت حاسة إنى مش فاهمة حاجة خالص وتايهة وخصوصا بعد ما الدكتور قال إن هو ده سبب تأخرها فى المشى وكمان سبب تصرفاتها إللى فيها سمات توحد وزوجى سأل طبيب تانى فى التيليفون قاله إن إللى عندها مش توحد دى تصرفات تشبه سمات التوحد بسبب المشكلة إللى فى المخ بصراحة وقتها أنا كنت مصدومة وحاسة إنى مش فاهمة حاجة بس راودنى أمل إن بدل عرفنا سبب المشاكل إللى عندها يبقى ممكن إن شاء الله تتعالج.. بس إتضح إن مشكلة المخ ملهاش طبعا علاج لأن مكان الكيس خطير والدكتور قاله مش فى إيدينا إلا إننا نعالج الأعراض وبس ونطمن على قاع العين عندها وكمان الحواس زى التذوق والشم لأن الكيس فى المكان المسئول عن الحاجات دى مع إنه مش ضاغط على المراكز دى بس وجوده مسبب مشاكل وبالمتابعة إن شاء الله هتوضح حالتها أكتر
بس الدكتور قال إن بالنسبة للمشى هنبدأ معاها علاج طبيعى من دلوقتى وكمان كتبلها
omega-3 _ stimulant(لتحسين معدلات النشاط الذهنى ) _ حديدHydroferrin
وحقن cerebrolysin
بس أنا مشكلتى إنى لحد دلوقتى حاسة إنى لسة مش شايفة الصورة كاملة .. ومش عارفة هل حالتها دى أفضل من التوحد ولا أخطر ولا ممكن يكون عندها سمات توحد (بتوابع التوحد طبعا يعنى عدم إكتساب المهارات واللغة وإلخ) +المشكلة إللى فى المخ دى وده يصعب العلاج أكتر
ومش عارفة يعنى هى حالتها بالشكل ده مجرد ما تاخد الأدوية هتعرف تكتسب المهارات لوحدها وكمان اللغة ولا برده هتحتاج برامج تأهيل كل إللى الدكتور قاله بخصوص الموضوع ده( متخافيش إن شاء الله هتكون كويسة )
وسألت الدكتور هل اللى عند بنتى ده سمات توحد ولا تصرفات تشبه سمات التوحد بسبب المشكلة إللى فى المخ ... رد عليا الدكتور وقالى __ (طيب تفرق إيه معاكى )
أنا قولتله تفرق إن لسمات التوحد توابع أخرى زى عدم قدرة الطفل على التخيل أو التعلم فى مجموعة وعدم فهم اللغة وتوظيفها إنما لو هى مجرد سلوكيات بس ظاهرة قدامنا يعنى يكون التركيز على تعديل السلوكيات دى وهى هتتطور بشكل طبيعى
فقالى عامة الصورة دى مش هتكتمل أو تعرفى تتأكدى منها إلا لما توصل ل3 سنين
بس أنا سألت نفسى أنا هستنى لما توصل 3 سنين وده ممكن يكون غلط عليها ومش فى مصلحتها
وبالنسبة للحمية معنى كدة إنها مش محتاجاها لأن السبب معروف ومشكلة المخ هى إللى مسببة فى سمات التوحد وملهاش علاقة بمشاكل الهضم وخصوصا إن بالنسبة لأكلها انا عمرى ما لاحظت عليها أى مشكلة فى الهضم أو الإخراج لما بتاكل منتجات ألبان أو قمح .. بس بلاحظ لما بتاكل زبادى إن البراز بتاعها بيطوف فوق الماء وكأنه مختمر هل معنى كدة إنه بيختمر فى الأمعاء ومش بيهضم كويس ولا ده طبيعى لأنه أصلا موجود في الزبادى خميرة
وهل معنى كدة إنها مش محتاجة تحاليل معادن أو خمائر أمعاء والحاجات دى
وإمبارح روحنا للدكتور وليد رأفت جراح مخ وأعصاب مشهور جدا فى مصر وبصراحة كل الناس بتشهد له بالعلم والخلق
المهم أول ما شاف الأشعة قال الكلام ده بالظبط وبمنتهى الهدوء ( المشكلة دى بسيطة جدااا وملهاش أى خطورة بالنسبة للضمور البسيط ده هيكون بس تأثيره تأخر بسيط جدا فى إكتساب المهارات بالمقارنة بإللى فى سنها .. إنما كيس الماية مفيش منه أى مشاكل )
فوالدى سأله هل ممكن يختفى لواحده أو نعمله عملية
رد عليه الدكتور قاله ( هو مش هيختفى لواحده ولا محتاج عملية لأن ملوش تأثير وشبهه بكأنه حسنة طالعة فى الوجه زيادة موجودة بس ملهاش تأثير )
فـأنا قولتله إنها عصبية ومش إجتماعية
فقالى هو فعلا تأثيره هيقتصر بس على السلوكيات ممكن يأثر فعلا بسلوكها
حتى إنه كتبلها نوع من النقط بس إسمه
Aquagen
وقال تاخده لمدة شهرين ويشوفها تانى
وبعدين سألته هل تتوقع يا دكتور إنها ممكن تحتاج فى وقت ما لجلسات تخاطب أو تعديل سلوك فقالى مظنش إنها هتحتاج لشئ من ده بس هى هتتأخر شوية فى التطور عن أقرانها
ونصح زوجى بإنه ميكررش الحقن إللى كتبهاله الدكتور الأولانى اكتر من 8 حقن
وبالنسبة للعلاج الطبيعى .. الدكتور المعالج قال إنها كويسة بس عندها مشكلة فى الركبة اليمين هى إللى بتخليها تفقد توازنها وده إللى مأخرها فى المشى وهتحتاج لعمل ركبة على مقاسها تلبسها مدة العلاج وإن شاء الله دى هتسرع من فترة العلاج (يعنى إتضح إن تأخر المشى مش بسبب المخ أو سمات التوحد)
أنا محتارة ومش عارفة أقدر إزاى أعرف إن كانت بنتى مشكلتها بس فى المخ وإنها مش عندها توحد كمان لأنها هتفرق كتير.. بس الدكتور إدانا معاد تانى يوم 28 ..وزوجى مقتنع بكلام الدكتور ومش عايز يشتت نفسه وبيقولى إستنى نشوف نتيجة العلاج الأول ..
تعليق