بالصور: يوسف ابو زهري ما اتعذبش

[بنت فلسطين 6]

الرسالة منقولة من نوارة نجم

Wednesday, 14 October 2009

بالصور: يوسف ابو زهري ما اتعذبش

اياك حد يفتح بقه ويقول لي ليه كده يا نوارة، بصوا، بصوووووا كويس، يوسف ابو زهري ما اتعذبش..... ده اتهرس


حسبي الله ونعم الوكيل فيك يا احمد يا موسى، بجد يعني، اللي بيعذب ده انا باتعامل معاه على انه مش انسان اصلا


بس اللي بيدافع عن التعذيب ويداري ويبرر او حتى يطنش عليه ده ايه؟ مش خايف من ربنا؟ مش خايف من ربنا؟



بس احنا مستنيين الطبيب الشرعي طبعا، لان ممكن اللي على وش الشهيد دي تبقى اثار الصفرا والامراض المزمنة اللي الداخلية اتكلمت عنها في بيانها، لا وبص بيدافعوا عن نفسهم بايه؟ "احنا ما عذبناهوش، هو اللي كان عنده امراض مزمنة كتير وكان عنده الصفرا" طب اصلا واحد وعنده كل الامراض دي محبوس ليه؟ وزي ما انتوا شايفين اللي عنده امراض مزمنة بيبقى ده وشه لما بيموت... خلي طلبة الطب يتثقفوا بقى


الله يفضحكوا


حسبي الله ونعم الوكيل، يارب اقتص له بس مش مننا والنبي يارب... احنا رجعنا للصور دي تاني؟ طب المصري ينفع نرفع له قضية هنا، انما ده ينفع ايه؟ طب ينفع؟ يعني ينفع نعمل له قضية زي عماد الكبير والطفل ده اللي في اللنك؟ وللا ايه؟ وللا عشان مش مصري مالوش دية؟ وللا عشان فلسطيني عادي يعني كل اللي يشوف اي فلسطيني يعذبه هو حر؟ ماهم ملطشة بقى، اصل اسرائيل وحكومة عباس الضغط عليهم كتير، ودول ملايين، المساكين ح يلاحقوا على مين وللا مين؟ يبعتوا لنا شوية نساعدهم زي ما جبنا العراقيين ندربهم كده على تعذيب المقاومة، وللا عشان من حماس كل اللي بيصوتوا على اي حاجة هابلة ح يعملوا عبط؟ بقى لو مصري مات الموتة دي في السعودية ورجعت لنا جثته عاملة كده كنا سكتنا بشرشحتنا دي؟


طب بقى افتكروا الكلام القذر اللي ناس قالته هنا على السعودية ايام الطبيب المصري وتخيلوا حماس قالت زيه، ح تعملوا فيهم ايه؟ والسعوديين ياعيني استحملوا الشتيمة وسكتوا، ده احنا عشان حتة ماتش لا طلع ولا نزل مشرشحين للجزائريين وفاضحينهم ووصل الامر ان شوية اقذار يشتموا جميلة ابو حريد اللي تفتها انضف من مليون من عينتهم الفشلة التافهين العاطلين اللي لا حصلوا رجالة ولا حصلوا ستات ولا حتى القطط تستعناهم


بقى ده لو مواطن امريكاني كنا قدرنا نعمل فيه كده؟ بقى ده لو اسرائيلي كنا اتجرأنا نقبض عليه اصلا؟ بقى الجاسوس الاسرائيلي بيتعمل فيه كده؟ بقى تاجر المخدرات الاسرائيلي بيتعمل فيه كده؟ بقى الراجل الاسرائيلي اللي جه ينشر الايدز عندنا حد عمل فيه كده؟ دول رحلوه، رحلوه وماحدش مسه، فاكرينه؟ الحلوين مواليد التسعينات ما يسمعوش عنه عشان ماحدش بيفتكر اسرائيل بتعمل فينا ايه


ينفع يترفع له قضية ده؟


ملحوظة، اللنك جبته من على التويتر من عند مهندس حر اللي جابه من ميدو اللي جابه من على الفيس بوك


الله يرحمه، تخيلوا الفزع اللي كان عايش فيه لحد ما ربنا نجده وفك اسره، ده اتعمى من كتر التعذيب.. معلش يا حبيبي، ما هانش علينا نبعتك الاخرة من غير ما نديك الجنسية المصرية


نسيت اقول ملحوظة كمان:


طبعا زي ما احنا كلنا عارفين، تصوير حماس لجثة الشهيد


"ماهو الا متاجرة بالدم الفلسطيني.. كفاكم متاجرة بالدم الفلسطيني"


ما يقولوها.. ما يقولوها ما البجاحة لها ناسها




حسبي الله ونعم الوكيل​

 

[الصقر العماني]

رد: بالصور: يوسف ابو زهري ما اتعذبش

لا حول ولا قوة إلا بالله
حسبي الله ونعم الوكيل

 

[بنت فلسطين 6]

رد: بالصور: يوسف ابو زهري ما اتعذبش

حسبي الله على الظالمين

وعلى كل من له يد في تعذيب الفلسطينيين


شكرا على مروركم

 

[نورالقرآن]

رد: بالصور: يوسف ابو زهري ما اتعذبش

صور يشيب لها الشعر
حسبى الله ونعم الوكيل
فى كل ظالم وفى أمن الدوله المصريه
اللهم انصر المسلمين فى كل مكان

 

[خلينا نعيش]

رد: بالصور: يوسف ابو زهري ما اتعذبش

[align=center]
لا حول ولا قوة الا بالله
حسبي الله ونعم الوكيل
[/align]