اهل الخبره بنتي فيها توحد ولا لا

[يا كريم يا شافي]

السلام عليكم و رحمة الله و بركاته

انا عضوة يديده و أول مره اشارك و ياليت تساعدوني

عندي بنت عمرها الان سنتين و شهر ,من يوم كانت بالاشهر مجابله التلفزيون (طيور الجنه) ماشي غيرهم ,
انا طبعا كنت ادرس و وقت دراستي ما يناسب اني اقعد مع بنتي ,المهم البنت مجابلة التلفزيون من تصبح لحد ما تنام
مع الشغاله كانت تحط الها طيور الجنه و بنتي مستانسه عليهم يعني ما في تواصل معاها لا بالكلام و لا باللعب
اهلها طيور الجنه عمو خالد و عمر الصعيدي و بنت عمها ديمه بشار هههههههه استغفر الله ( شر البلية ما يضحك )
انا كنت اشوفها مستانسه عليهم و مكيفه اقول برايها يا حليلها في احد مونسنها و من الغباء اللي فيني اتحسبها
بتتعلم من التلفزيون و بتصير بلبل ,و ظلت على هالحال لين كملت البنت سنه و نص بداية السالفه كنت اناديها باسمها
فلانه فلانه ما تنتبه علي من اول مره بس من اشغل طيور الجنه اطير الله يحفظها شكيت في اذنها و قالوا عندها ماي وراء الطبله
و لحميه سولها عمليه و الدكتور قال يبالها 6 شهور أو أكثر لين ما تندمج و ياكم و تسمعكم و و و و
للعلم ما كملت البنت 6 شهور من سوت العملية
وقفت من الجامعه و اهتميت فيها و عطيتها حقوقها فديتها و بعدني متلومه فيها الحين من سوت العمليه من 3 شهور تقريبا
الحين يوم تشوف اليهال يلعبون فتحي يا ورده تسير عندهم و تبا تلعب وياهم للعلم انها ما كانت ادز ويه لاحد مول حتى انا
و ابوها بس الحين تميزنا و تحبنا يعني يومارد من السوق اتيي صوبي ومن يناديها ابوها تروح صوبه و تحبه بس انا لازم انادي
عليها مره و 2 و 3 و عقب اطالعني و احيانا من اول مره تركيزها كان ضعيف بس الحين الحمد لله تركيزها احسن
تقول كلمات بسيطه ماما بابا بس ما تقصدنا فيهم و كلام مب مفهوم تحرطيم اعالجها عند دكتورة نطق و الحمد لله
الدكتوره مستانسه ما شاء الله تبارك الرحمن تركب و تشيل و تحط يعني زينه الحمد لله

أعراض التوحد اللي فيها :
تواصلها الاجتماعي ضعيف بس بدا يتحسن على فكره ما تخاف من اليهال تلعب وياهم بس بروحها فهموها انتوا عاد و احيانا وياهم بس بسرعه تمل حتى من الالعاب
كانت وايد تتحرك ما تقر بس الحين وايد خفت يعني اخليها تقعد في ثباني يوم اكون قاعده ويا اهلي و تقعد بس احسها في عالم ثاني
ما تنجذب للشي فقط للي تحبه عادي لو حد من اليهال عنده لعبه و تباها تسير و تشلها و تحاول تاخذها
ما تفهم للاوامر يمكن لان محد كان يكلمها الحين تفهم لا - خلاص كانت تضرب براسها الارض بس الحين لا و نادر تضحك من دون سبب
ادور على عمرها دقيقه تقريبا او اقل تحب الطلعات و تموت على السياير تسير الكراج تحاول تفتح باب كل سياره عسب تركب
تركيزها تحسن وايد عن قبل بس ما تركز وايد بس في الاشياء اللي تحبهن تركز و يوم اغنيلها اناشيد طيور الجنه اطالعني و ترفع لسانها تبا تقول نفسي بس ما تقول
ترفرف بديها احسها ما تعرف الاشياء الخطره ما تقلد ما تاشر على اللي تباه تسحبني من ايدي و توصلني للشي او تييبلي الرضاعه
تعرف تاكل و تشرب تمسك القلم و تشخبط على اليدار احيانا تييب بيب العصير و تحاول تشخبط فيه على اليدار او خشب المشاوي اونه تشخبط فيه
تعرف للايباد تفتح الالعاب و تلعب فيهم صح اطالع عمرها في المرايه و تسوي حركات ما تخاف من الشي اليديد يعني عادي تجرب لعبه - أكله
ما تفهم شو اقولها لاني يوم اكلمها هيه تتحرك
يوم العابها تتفاعل وياي و تضحك - و تباني العبها يوم العب اختها اتي عسب العبها بس مب كل الالعاب اللي هيه تباهن و تضحك و تكون مبسوطه
بس من تقوم من نومها احيانا اتي عندي و احيانا تحوس بروحها في الغرفه و تحب تحط ايدها في عيوني ههههههه
نسيت اقول شي من كم شهر منعت عنها التلفزيون نادرا احط طيور الجنه حقها

أدري حشرتكم و ما خليت شي بس حبيتكم في الله و شفتكم كيف متعاونين و تساعدون بعض
وفي مشكله بعد تمص صبعها وايد و اريد امنعها ممكن تساعدوني

الحين سوالي تحسون بنتي فيها توحد ولا لا و التطنيش اللي فيها شي تعودت عليه و يبالها وقت (يعني سنه و نص لا كلام و لا غيره ) ولا شي ثاني

على فكره وحده بنتها نفسي و قالوها ان عزلت البنت فتره عن العالم فعزل المخ نفسه و يباله و قت لين ما يرجع

اترياكم و شو تنصحوني

 

[الام الصامده]

رد: اهل الخبره بنتي فيها توحد ولا لا

حبيبتي اعتقد انه من الافضل ان تفحصي ابنتك عند طبيب متخصص وعند بالكويت في دكتوره عبير عوض

رغم ان في بعض السمات موجوده بابنتك الا انه يجب ان تفحصي مره اخرى حتى تطمئني

 

[يا كريم يا شافي]

رد: اهل الخبره بنتي فيها توحد ولا لا

مشكوره حبيتي على الرد و انا من الامارت مب من الكويت

و اذا فيها كيف ابدا وياها بالحمية

و عطوني أماكن ثقه في الامارات و لحد يقولي مركز دبي للتوحد

سرت على اساس جلستين رحت الجلسه الاولى و الثانيه صليت صلاة الاستخاره

و ربي بعدني عنهم

 

[مسك]

رد: اهل الخبره بنتي فيها توحد ولا لا

هلا أختي انتي قلتي المشكله وانتي قلتي الحل مشكله بنتك ماي الاذن وزاد عزلتها التلفزيون والحل ان حتي البنت لو ما فيها توحد لكن الطريج نفسه بروتوكول دان امنعي التلفزيون وابعدي الأكل الضار الغير طبيعي ودربيها ولعبيها دخليها حضانه وبأذن الله تقفز قفزه من التطورات انت ما يهمك شنو تشخيص الحاله انت عندك مشكله تبين لها حل
فابدئي معاها صح مؤ خسرناه اذا وكلتيها اكل صحي مؤ خسرناه اذا سكرتي التلفزيون والأجهزة التلكترونيه
الله معاك يحمي بنتك ويرعاك
بس ماقلتي منو شخص بنتك توحد

 

[يا كريم يا شافي]

رد: اهل الخبره بنتي فيها توحد ولا لا

هلا حبيبتي مسك بعدهم ما يعرفون شو حالتها بالضبط

في العين محد رضا يقول توحد قالوا صبري عليها
و رحت دبي و قالوا توحد بس ما ارتحت لكلامهم
مب لاني مابا يكون في بنتي توحد كل شي من الله و الحمد لله على كل حال
بس هيه على اي اساس قالت توحد معنى البنت كانت اوكيه
و صليت صلاة الاستخاره و الله بعدني عنهم و على فكره دخلتها حضانه تعليميه
و المس تقول كان ولد نفسها و الحين تغير عقبالها
و في العين يوم قلتلهم دبي قالوا توحد ظحكوا الحين انا ما اعرف بنتي شو فيها ؟؟؟؟؟؟؟؟
و مشكوره على النصيحه في ميزان حسناتج إن شاء الله
واللي يعرف منو في الامارات عنده خبره بالعلاج بالبروتوكول دان يساعدني

 

[ابو غلا العنزي]

رد: اهل الخبره بنتي فيها توحد ولا لا

انصحك ان تضعي ثقتك بالله سبحانه وتعالى وتتوكلي عليه وتسوين تحاليل حساسية الغذاء والمعادن في دكتور اسمه المومني بالاردن اذهبي اليه هو يسوي لك تحاليل كامله ويعطيك التشخيص والعلاج

الشي الثاني دربي بنتك على تواصل معك العبي معها وانزلي لمستواها في اللعب

انتي نفس حالة بنتي وشخصوها طيف توحد بسيط لا يهمني كثيرا التشخيص بقدر ما الذي استطيع ان اقدم لبنتي

انصحك اولا بتشخيص ... ثم التدريب على التواصل والحمية لا تسوينها الا اذا سويتي التحاليل اللازمه والله يشفي لك بنتك وبنتي وجميع ابناء المسلمين

 

[ابو غلا العنزي]

رد: اهل الخبره بنتي فيها توحد ولا لا

انصحك ان تضعي ثقتك بالله سبحانه وتعالى وتتوكلي عليه وتسوين تحاليل حساسية الغذاء والمعادن في دكتور اسمه المومني بالاردن اذهبي اليه هو يسوي لك تحاليل كامله ويعطيك التشخيص والعلاج

الشي الثاني دربي بنتك على تواصل معك العبي معها وانزلي لمستواها في اللعب

انتي نفس حالة بنتي وشخصوها طيف توحد بسيط لا يهمني كثيرا التشخيص بقدر ما الذي استطيع ان اقدم لبنتي

انصحك اولا بتشخيص ... ثم التدريب على التواصل والحمية لا تسوينها الا اذا سويتي التحاليل اللازمه والله يشفي لك بنتك وبنتي وجميع ابناء المسلمين

 

[يا كريم يا شافي]

رد: اهل الخبره بنتي فيها توحد ولا لا

الحمد لله و الشكر على كل حال
الله قادر على كل شيء
الله يشافي عيالنا يا رب

 

[ياربي رحمتك]

رد: اهل الخبره بنتي فيها توحد ولا لا

اختي كأكنك تتكلمين عن حالة ابني بس ابني بدأت هالامور بالتدريج بعد سقوطه من زحلاقيه المهم نفس بنتك وفيه اللي شخصه سمات توحد وبكثرة الاستغفار وحليب الابل بعد الله وكنت مسويه حميه وطبعاً ماطولت اللي ركزت عليه هو الحليب وصارله قفزه نفس وضع بنتك ومع التدريب صار اركب البتلز والتركيبات والاشكال الصور اللي مقسمه نصين واحياناً يلعب مع الاطفال وطبعاً ملول يرجع يلعب بروحه واحياناً ينطر لي وتركيزه احسن من الاول لانه في السابق كان فيه خمول والله اغفرلي اهمالي كان عند tv لاني توقعت انه بوسع مداركه وبتعلم الكلام.
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
نصيحتي لاتضيعين الوقت روحي لدكتور دان سواء الدكتوره عبير في الكويت
او دكاترة الاردن وفيه اعضاء في المنتدي اتابعون معاهم.لانه ضروري اخذ الفحوصات والمكملات تحت اشراف دكتور دان.
ومن ناحية الحميه الدكتوره عبير اخذت تلومني بقولها حرام كيف تعملي الحميه من غير فيتامينات وكالسيوم لانك اتضرين الطفل.
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
واعتقد مادامها تلعب مع الاطفال فالعالم الله انه ليس توحد . الله اطمن قلبك عليها.
انا بالنسبه لتشخيص ابني فهو تأخر في التواصل اللغوي.

 

[يا كريم يا شافي]

رد: اهل الخبره بنتي فيها توحد ولا لا

هلا اختي( ياربي رحمتك ) كلامج و كلام الاخوان يطمن يزاكم ربي كل الخير
دكتوره عبير كيف اتواصل وياها انا من الامارات
كيف المواعيد و الترتيبات كيف التواصل
ياليت حد يخبرني

 

[ياربي رحمتك]

رد: اهل الخبره بنتي فيها توحد ولا لا

هلا اختي تطمني ان شاء الله خير ومثل ماقال الاخ توكلي علي الله.
ووالله اني فرحت انك طلبتي كيف انك تتواصلي مع الدكتوره عبير لان. شي حلو بنتك ماشاء الله في حضانه تعليميه ولكن لاتأخذي بكلام المس لانولدي كنت اعطيه جلسات بعيادة دكتور وللاسف كان يقنعني ان اسجل ابني عندهم سبعة شهور وراح اشوف النتيجه من اول شهرين لكن لم اقتنع لانني قرأت ان الطفل وعفواً علي التفسير بس فعلاً هذا اللذي لامسته يصبح مثل حيوانات السيرك بافعل يتدرب وينقاد للاوامر ولكن بدون وعي وفهم فما الفائده.
والدكتوره عبير اتصلي بالعياده بعد الاستخاره وهم يخبرونك عن الموعد واتمني ان تجدي موعد قبل رمضان يمكن اذا فيه احد ألغي موعد طفله بكون من نصيبكم .
الرقم طبعاً فتح الكويت
وبعده رقم العياده
22530287

 

[مسك]

رد: اهل الخبره بنتي فيها توحد ولا لا

أختي في موضوع مثبت مسويه الاخ وكسر بقسم التدريب وكاتب أرقام الاطباء ألدان في الخليج رجعي للموضوع لكن نصيحه من قلب أقرئي المواضيع المثبته في قسم التوحد لانها تختصر لك خبره سنين لكن مؤ كل شي مكتوب اطبقينه علي بنتك أخذي اللي يفيدك انا قبل اقرأ واتقمص الدور شني المحقق اطبق كل شي علي ولدي لا انا بإحساس ام بنتك ماي الاذن والتلفزيون هم مشكلتها لا يدخلونك بدوامه التوحد والحلو انك استخرتي رب العالمين
ياحلو الامارات وياحلو اهلها بس

 

[صبري بالله]

رد: اهل الخبره بنتي فيها توحد ولا لا

أختي الله يشفي ابنتك ويطمنك عليها
أحيانا تتشابه أعراض سمات التوحد مع من عانى من وجود سوائل خلف طبلة الأذن -لأنه ابني عملها أكثر من مرة وقبل أن اعرف بوجود سوائل خلف طبلته كنت أعتقد انه توحد ولكن لله الحمد أول ما عملنا العملية بدأ بالتحسن ولكن تعبت كثير لأنه كان يعكس الضمائر ويقلب المذكر والمؤنث , والأن ما شاء الله عليه -
وشاء الله أن نرجع نعمل نفس العملية لابنتي الصغيرة , وكنت على أمل أن تكون مثل أخوها لكن للأسف لم تتحسن لنبدا بالشك ورحلة علاج التوحد
اعرضي ابنتك على طبيب متميز لتتأكدي , وبصراحة لا أعرف طبيب هنا يفيدك بهذا الموضوع , ولا سمح الله إذا كان سمات توحد فلن يفيدك طبيب هنا , لأنهم ينظرون للتوحد على انه اضطراب نفسي يعني ليس له علاج
أتمنى لك التوفيق

 

[يا كريم يا شافي]

رد: اهل الخبره بنتي فيها توحد ولا لا

حبيبتي ( يا ربي رحمتك ) مشكوره و في ميزان حسناتج يارب و تسلمين على النصايح

(مسك) حبيبتي دامج تحبين الامارات حياج عدنا و يا مرحبا الساع فيج بحطج في عيوني و بغمض عليج

(صبري بالله ) الله كريم و إن شاء الله مشكله و تعدي و أذكرها و أحمد ربي

ورقم الدكتوره خذته و سيفته

و إن شاء الله ألحين مسافره أسبوع زمان و الله يكتب اللي فيه خير

 

[ياربي رحمتك]

رد: اهل الخبره بنتي فيها توحد ولا لا

اختي (ياكريم ياشافي ) مشكوره ولك بالمثل
والله ايسر امرك ويفرح قلبك