الحمد لله تعالوا شوفوا تجربتى مع حبوبتى

[أختكم فى الله]

السلام عليكم ورحمة الله وبركاته
من أسبوعين طبعا كنت محبطة بسبب فشلى فى إختيار الطبيب للمرة الثانية
وكمان ملقيتش مركز مناسب لبنتى .. يعنى لا طبيب ولا مركز ولسه مش عارفين هنبدأ المشوار إمتى
فقولت لنفسى مش هينفع بقى لازم نشتغل مش هنضيع وقت فى البحث عن تشخيص أو مركز أكتر من كدة
والحمد لله قررت أحاول انا معاها فى تدريبها على قد ما أقدر لحد ما نشوف هنعمل إيه
فلاقيت مهارات العام الأول فى موضوع للأخت أم محمود جزاها الله كل خير وشوفت إيه إللى ناقص بنتى منها بصراحة جالى إحباط حسيت إن نصهم متعرفش تعمله وهى هتكمل سنتين الشهر الجاى .. طيب هتلحق تحصل كل ده إمتى وأنا هعرف أعلمهولها ولا لأ .. بصراحة مش هكدب عليكم أنا جالى إحباط حتى محبتش أبص على مهارات العام الثانى علشان إحباطى ميزدش
وبدات معاها بالمهارة إللى عليها الدور وكانت .. إنها تحط مكعب فى علبة (يعنى تاخد المكعب بإيديها وتحطه داخل علبة ) يعنى حاجة سهلة وبسيطة جدا بيتهيألى يعملها طفل عنده 6 شهور ومن نفسه كمان وهو بيلعب (سبحان الله) كنت حاسة إنها بالنسبالى عبور خط برليف
وبدأت معاها أعلمها وزاد إحباطى طبعا لأنها رافضة تمسك المكعب وكمان رافضة تلمس العلبة واحيانا مش بترضى تبصلى ومتدايقة ويبقى حظى حلو أوى لو سبتلى إيديها ومسكت المكعب وانا إللى أحط إيديها فى العلبة ويادوب دقيقتين وتضايق وتعيط ... ولو انا عملت قدامها المهارة بنفسى مش بترضى تبصلى مع إن تواصلها البصرى كويس جداا الحمد لله بس هى رافضة إنى أعلمها حاجة مش على مزاجها .... طبعا إحباطى زاد وقولت لما دى مهارة واحدة وبقالى أسبوع رافضة إنها حتى تبصلى وأنا بعملها ..أومال باقى المهارات هتاخد قد إيه وياترى انا هقدر أعمل كدة لوحدى ولا لأ ومش هقولكم نفسيتى كانت إيه

بس فى نفس الوقت كنت بشغلها فيديو على الكمبيوتر لأسماء الحيوانات وأصواتها لما بكون مشغولة عنها فى شئ ... ولاحظت إنها ما شاء الله من تانى يوم حفظت بعض الحروف وبترددها مع الفيديو وكمان بتقلد صوت بعض الحيوانات .. وأنا كمان بلاحظ عليها إنها لو حبت نشيد فى التيليفزيون وركزت معاه ممكن من تانى مرة تشوفه تبدأ تردد كلمات فيه (بس لو ركزت) وانا بحس أصلا إن مشكلة أطفالنا كلها فى رفض التعلم وعدم التركيز إنما اظن إن عندهم مقدرة كبيرة على التعلم

المهم ربنا ألهمنى بفكرة .:3:. إنى أصورلها المهارة فيديو وانا بعملها بنفسى مع الشرح بكلمات بسيطة والتكرار طبعا
والحمد لله صورتهالها ولما عرضتها ليها كانت مبسوطة جداااااااا (سبحان الله) هى أصلا بتحب تشوف فيديوهات العيلة وخصوصا إللى بكون فيها أنا وباباها ..
سبتها تتفرج لواحدها وحطيت العلبة والمكعب جمبها .. لاحظت إنها بتبص على الفيديو وترجع تبص للعلبة جمبها وفرحانة وحاولت تحط إيديها فى العلبة بس تراجعت وبعدين مسكت العلبة وسابتها تانى وتتفرج بتركيز وفرحانة ... انا طبعا حسيت إن فى تقدم وبرده ماهملتش إنى اقعد معاها وأعلمها بنفسى بس برده مكنتش بتستجيبلى

إللى لاحظته بعد يومين ... كنت عند أمى وحبيبة بدأت تعيط وكانت متضايقة فشغلتلها الفيديو على الموبايل بس قفلت الصوت علشان كنت بتكلم مع ماما .. ففوجئت بحبيبة بتبص فى الفيديو ولما شافت المكعب قالت (أعب) ولما كنت بحط المكعب جوه العلبة لاقيتها بتقول ( جووووه) وبتكرر الكلام مع الفعل طبعا فرحت جدااا وقولت ما شاء الله ربنا يزيد ويبارك
ثالث يوم بقى قولت بلاش أشغلها الفيديو وأقعد معاه انا فكانت بتلعب بعيد .. فجلست أنا على الأرض ومسكت المكعب والعلبة وقولت (ده مكعب ) زى ما بقول فى الفيديو وبنفس الطريقة ... لاقيتها سابت إللى فى إيديها وجاتنى بسرعة تتفرج عليا وتراقبنى وكانت مبسوطة كأنى بغنيلها نشيد هى بتحبه .... ولاقيتها بتمد إيديها فى العلبة وتمسك المكعب وتسيبه تانى بسرعة طبعا تقدم فظيع وطبعا دقيقتين وزهقت كالعادة
رابع يوم بقى كان إمبارح كنت بفطرها ومزاجها رايق فحاولت اديها المكعب فى إيديها وأقولها حطيه جوه ... بصراحة قبل ما اقولها حطيه جوه كانت هى حطاه ... وكررت عليها الأمر وبرده الحمد لله كل ما أديها المكعب تحطه جوه العلبة حوالى عشر مرات قولت كفاية بقى قبل ما تزهق الحمدلله حلو أوى كدة

النهاردة بقى ولله الحمد .. طبعا كررت معاها التدريب الصبح والحمد لله إستجابت ... بس أكتر حاجة فرحتنى النهاردة إنى كنت سيباها لوحدها فى الصالة وكنت فى المطبخ .. فسمعتها بتقول (أعب) (جوه) لاقيتها جايبة العلبة والمكعب وبتلعب لوحدها وبتحط المكعب فى العلبة وبتطلعه تانى أكتر من مرة .. كنت فرحانة جدااا وحسيت لأول مرة إنى بشوفها بتلعب ومستمتعة بالشئ إللى بتلعب بيه ... الحمد لله والفضل لله وحده وإدعولها يارب أشوفها قريبا بتعمل برج من المكعبات وبتلعب زى إللى فى سنها هى وكل أولادكم يارب

طبعا هى تجربة بسيطة وكلامى كان كتيييييييييييير وطويل أرجو إنه ميكونش دايقكم وخد من وقتكم كتير بس أنا حبيت أشركم فى فرحتى بأول تجربة مع بنتى فى تنمية المهارات والحمد لله عرفت مدخلها وبيتهيألى أكيد لكل طفل مدخل لتعليمه لازم نستفيد منه ومن الشئ إللى هو بيحبه وندخله العالم بتاعه أكيد علشان نستفيد منه مع محاولة إننها نطلعه منه بالتدريج إن شاء الله :23: ربنا يشفى كل ابنائنا ويفرحنا بيهم قريبا بفضله وكرمه

 

[شاطئ الأمل]

رد: الحمد لله تعالوا شوفوا تجربتى مع حبوبتى

أختكم في الله أنتي أم رائعة بالفعل كل طفل له مدخل لتعليمه كلامك سليم وجميل لقد سررت لهذا التقدم والانجاز الذي وصلت له ابنتك
وبالفعل انتي ام تمتلكين إرداه قوية .
يعطيك العافية

 

[أم عبود الغالي]

رد: الحمد لله تعالوا شوفوا تجربتى مع حبوبتى

ما شاء الله , الله يحفظها وخليها ليكم .. اختي عليك بتدريبات المكثفه لها إن كانت تستجيب وفكرة الفيديو هي من احدى وسائل تعليم التوحديين لأنهم بحبو يتعاملو مع الأشياء افضل من الأشخاص .. وبتقدري تعلميها اي مهارة بالفيديو حتى لو كان الي في الفيديو طفل آخر وإذا كان الطفل تعرفه أفضل مثل مهارة الحمام والأكل وما إلى ذلك ..

ومشكورة اختي الغالية لعرض تجربتك .. هههه وانا اقرأ الموضوع خليتيني اتكلم مصري من كتابتك ..:24:

والله يوفقك لكل خير ووفقنا لخدمة اطفالنا الغاليين ..

 

[توحدية]

رد: الحمد لله تعالوا شوفوا تجربتى مع حبوبتى

بسم الله ماشاء الله
والله فرحتينا
خليكي كده على هذه الطريقة وانتقلي من تدريب الي تدريب وان شاء الله هتتقدم بنتك

 

[ازميرالدا]

رد: الحمد لله تعالوا شوفوا تجربتى مع حبوبتى

اختي اختكم في الله
ما شاء الله تقدم رائع و ان شاء الله مزيد من التقدم
موضوعك مفيد جدا ويؤكد فعلا ان كل طفل له المدخل بتاعه اللي ممكن نلفت انتباهه بيه
اذكر من سنوات كانت ابنتي لا تستجيب ابدا لاسمها و لكنها كانت مهتمه جدا بالمكعبات و بتصنيفها حسب لونها فكنت اجي من غير ما تاخد بالها و اخد مكعب من اللي بتلعب بيهم و انادي عليها طبعا ولا هي هنا فكنت احرك راسها ناحيتي و اضع المكعب في مستوي نظري فكانت تنظر للمكعب و تاخده علشان تحطه مع باقي المكعبات و مره في مره بقت تبصلي من اول مره لانها بقت متوقعه ان معايا احد المكعبات لغايه ما بطلت موضوع المكعب و بقت تبصلي انا
وصدقت تماما مشكله اولادنا الاساسيه هي في التركيز و الرغبه في التعلم فلو دخلنا لهم من حاجه بيحبوها بتكون النتائج جيده مع كثير من التكرار و الصبر طبعا
ربنا يوفقك و دايما تفرحينا باخبار حبيبه الجميله

 

[صمت الغروب]

رد: الحمد لله تعالوا شوفوا تجربتى مع حبوبتى

وعليكم السلام ورحمة الله وبركاته

ما شاء الله تبارك الله
الله يحفظها ويحميها ويوفقك أختي في تربيتها وتعليمها

 

[بنت التحدي]

رد: الحمد لله تعالوا شوفوا تجربتى مع حبوبتى

ما شاء الله , الله يحفظها وخليها ليكم

 

[أم دانيال]

رد: الحمد لله تعالوا شوفوا تجربتى مع حبوبتى

عزيزتي أختكم في الله
مبروك وانشالله من مهارة الى اخرى
ربي يفرحك فيها ويطمنك عنها.

 

[بنت بغداد]

رد: الحمد لله تعالوا شوفوا تجربتى مع حبوبتى

 

[ام التواءم]

رد: الحمد لله تعالوا شوفوا تجربتى مع حبوبتى

اختى اختكم فى الله...

ما شاء الله مزيد من التقدم لابنتك واعتقد انك مسكت خيط البداية فلا تجعليه يفلت منك...داومى علىهذه التدريبات بصورة مكثفة وستجدين ان شاء الله كل خير بعيدا عن الذين يخفضون هممنا ...توكلى على الله وربنا معك:23:

 

[المتفائلة]

رد: الحمد لله تعالوا شوفوا تجربتى مع حبوبتى

مبروووووووووووووووك نحن الامهات كل ميتعلم طفلنا مهارة جديدة بنحس اننا ملكنا الدنيا استمرى عزيزتى وانشالله اتكون النتائج القادمة افضل وافضل

 

[أختكم فى الله]

رد: الحمد لله تعالوا شوفوا تجربتى مع حبوبتى

أخواتى شاطئ الأمل , أم عبود الغالى ,توحدية , أزميرالدا , صمت الغروب , بنت التحدى , عائشة أم دانيال ,بنت بغداد ,أم التوائم, متفائلة والله فرحت كتييييير بردودكم ومشاركتكم ليا جزاكم الله كل خير وربنا يوفقكم مع أولادكم يارب ويفرحنا كلنا بيهم قريبا بإذن الله ... أنا كمان شايفة إن من المهم إن الواحد ميستسلمش للإحباط .. لأنى فى أول أسبوع كنت محبطة جداااا لدرجة إنى كان بيتهيألى إنى هموت قبل ما أشوفها بتحط المكعب فى العلبة :7: أو يإما لو حطته هيكون بمزاجها ولوحدها مش بسبب تعليمى ليها ويا عالم هيكون اليوم ده إمتى ..... بس الحمد لله ربنا هو إللى ألهمنى الطريق ليها بدل كمان مكنت آخد وقت فى البحث عن طريق لتعليمها مع البحث عن طبيب :5:ومركز:5: كان هيبقى صعب أوى :17: الحمد لله .. وفعلا مشاركاتكم شجعتنى وفرحتنى كتير ربنا يجعلوا فى ميزان حسناتكم

 

[فاطمة سعد]

رد: الحمد لله تعالوا شوفوا تجربتى مع حبوبتى

ما شاء الله تبارك الله استمري اختي العزيزه والله يوفقك ويفرحك بتقدم بنتك وشفائها .

اللهم يا رب العرش العظيم اشفي ابنائنا وعافهم ,انت الشافي يا رب العالمين .

 

[ضحية التوحد]

رد: الحمد لله تعالوا شوفوا تجربتى مع حبوبتى

ألف مبروك ..والله فرحتينا ببنتك الحلوة,,,,, وعقبال اولادنا ,,يارب.:23::23:

 

[اسومي حبي]

رد: الحمد لله تعالوا شوفوا تجربتى مع حبوبتى

ماشاء الله ربي يحفظها ولا تخافي بتتقدم شويه شويه والله ولدي كان كذا واكثر اهم شي انها بتنطق حتى لو بتكرر وطريقة التصوير رائعه لكن جددي دائم
لانها بيوقف عقلها على ذلك

انا يابنات الدكتور شاف ولدي قال هذا مشكلته كلها في التركيز والحركه مع انه في البيت هادي وربنا يتمم ويعافيهم

 

[أختكم فى الله]

رد: الحمد لله تعالوا شوفوا تجربتى مع حبوبتى

أخواتى فاطمة سعد وضحية توحد وأسومى جزاكم الله كل خير على مروركم وردودكم ربنا يشفى كل أبناءنا يارب ويعافيهم وأنا فعلا صورتلها النهاردة فيديو آخر علشان أنوعلها ومتملش من الأولانى .. صورتلها التيليفزيون والتيليفون وبعض ألعابها أكثر حاجات هى بتهتم بيهم فى اليوم وسميتلها كل حاجة بهدوء وتكرار طبعا وكمان كنت بشغلها الألعاب وأفتح التيلفزيون وأقفله علشان يكون فى حركة فى الفيديو ومتملش وإن شاء الله يكون بفايدة ويارب أسمعها بتنطق كل الأسامى دى وبتوظفها صح ربنا قادر على كل شئ

 

[الوعد الحق]

رد: الحمد لله تعالوا شوفوا تجربتى مع حبوبتى

ماشاء الله
الله يسهل دربكم وكل يوم تفرحي فيها

 

[ام ريان]

رد: الحمد لله تعالوا شوفوا تجربتى مع حبوبتى

برافوعليكي اختي العزيزه والي الامام،وعقبال الخطوات القادمه:22:

 

[جوليا]

رد: الحمد لله تعالوا شوفوا تجربتى مع حبوبتى

ماشاء الله تبارك الله .. أختكم في الله ربنا يبارك لك فيها و ان شاء الله كل يوم تشوفي تطور جديد .. يبدو أن بنوتتك ذكية ماشاء الله وكمان هي عندها بداية لغة و مع عمرها الصغير باذن الله تكون فترة و تعدي مع التدريب المكثف و التدخل العلاجي المناسب راح يجي اليوم اللي تكتبي فيه موضوع تحررت من التوحد قريبا جداا يارب

 

[أختكم فى الله]

رد: الحمد لله تعالوا شوفوا تجربتى مع حبوبتى

جزاكى الله كل خير أختى أم ريان بارك الله فيكى

ألف شكر أختى جوليا على كلماتك الجميلة متتخيليش عملت فيا إيه لما قرأت كلمت تحررت من التوحد تفائلت وفرحت وكمان دمعت فى وقت واحد.. عقبالك قبلى إن شاء الله وربنا يفرحنا كلنا يارب بشفاء ابناءنا