متى وكيف اكتشفتي اصابة ابنك بالتوحد

[ابو فصولي]

السلام عليكم

كثيرا مايطرح علي هذا السؤال من الاصدقاء والاقارب، واحببت ان اطرحه هنا ليستفيد منه زوار المنتدى ويعرفوا النقاط التي ادت للشك بحال اطفالنا ليستفيدوا منها .

بالنسبه لأبني كل شئ كان طبيعي، نموه الحركي كان طبيعي جدا، جلس في وقته والحبو في وقته وكذلك المشي، وزنه طبيعي وملامحه وكل شئ الحمد لله .
البداية كانت في منزل والدتي، قالت ليش ولدك مايرد ابدا اذا ناديناه وكأنه مايسمع، قلت شئ عادي لانه صغير، قالت انا مو مرتاحه لوضعه لازم تعرضه على طبيب يفحص سمعه .
نسيت الموضوع شهر او شهرين وكانت كل ماتشوفني تقول افحصه افحصه لاتهمله ( الله يجزاها الف خير ويخليها لي ) المهم رحت لمستشفى الحبيب وعرضته على استشاري وقال الاطفال مانقدر نختبر ونفحص سمعهم لان فحص السمع تفاعلي ( يعني يركب سماعه في الاذن ويشغل صوت ويبدا يسألك تسمع والا لا ) والاختبار هذا مستحيل للاطفال، قالي الدكتور شوف فيه اختبار اسمه abr فحص استجابه جذع المخ بجهاز خاص، قلت وين طيب قال حاليا جهازنا متعطل ولكن شوف بالمستشفيات الثانية .
بحثت بالنت وحصلت مركز بشارع التخصصي يسوي هذا الاختبار، كلمتهم وحجزت موعد وقالوا لي لازم يكون الطفل وقت الفحص نايم، قلت اوكي .
جينا في موعدنا ونام الولد في غرفه الانتظار لاننا مصحينه من بدررري ، وتم الفحص واتضح ان سمعه سليم 100% الحمد لله .

بعدها بكم يوم بديت ابحث بقوقل ( ابني لايستجيب للنداء ) وكانت اغلب النتائج عن التوحد، وبديت اقرأ عن التوحد وكانت اشياء كثيرة فيه من ضمنها انه يضرب راسه بالجدار او بالارض ومايعرف يلعب بالالعاب ولا يختلط ولا يتكلم، بديت اشك واركز على حركاته وقلت لاااازم اعرضه على متخصص .
وسالفه فحصه طويييله ومعاناه لذلك اختصرها بان النتيجه طلعت طيف توحد ( اللهم لك الحمد والشكر )

شفى الله مرضانا ومرضاكم

 

[غموض امراة]

رد: متى وكيف اكتشفتي اصابة ابنك بالتوحد

تقريبا نفس حكايه ولدي
لمن كمل سنه ونص اهلي نبهوني على انه مايسمع لمن ينادوه ومايتكلم وحركاته عشوائيه وتكراره لكلمه دايم اسمعها يقولها
وكل ماكلم زوجي يفحصه يقول طبيعي لاتوسوسين باقي صغير
الين ماكمل ثلاث سنوات وهو على ذا الحال
وماكنت اعرف التوحد الا المسمى خلال دراساتي بالجامعه درست مفهوم التوحد ولكن مختصر جدا
وعملنا تخطيط سمع abr وطلع سليم
وبدت معاناتنا بالتشخيص من بين كثره الاطباء نفو التوحد تماما من ابني
وعرضته على طبيب نفسي سمعت انه يشخص التوحد واكد لي ان معاه توحد من بسيط الى متوسط
وعندي ولد الحين عمره سبع شهور غير اشوف تصرفاته "" التوحد جاب لي الهم والوساوس
الله يبعده عن اطفالنا الكابوس المخيف والشبح الغامض ويشفيهم من هذا الداء العضال

 

[ملكة الاحساس]

رد: متى وكيف اكتشفتي اصابة ابنك بالتوحد

حمودي كان نموه طبيعي و كان يقول ماما و بابا وبعدين تغير بداء يفقد
التواصل البصري و الكلام و صار يرفف و يحب طيور الجنة مررررة
ولمن ننادية مايرد ابدااااا و ينط كثيررررررر اغلب الوقت و مايلعب
مع الاطفال ولا ينجذب لهم ابداااا وديناة لدكتور مخ واعصاب عمله
إشاعه وطلع كل شي سليم و فحص سمع و طلع برضة سليم و الاخصائية
النفسية شافتة و عملتلة مقياس توحد و طلع عنده توحد بسيط اعتقد 30%
انتم كم طلع نسبة التوحدعند اطفالكم
​

 

[أصعب إحساس]

رد: متى وكيف اكتشفتي اصابة ابنك بالتوحد

في اي عمر اكتشفت هذا الشي يا ابو فصولي لا ن ولدي ما يرفرف بيديه ولا يضرب براسه بس له فتره دايم يقول اخخخخخ والحين يقول ابه وعلى طول يطالع فيني يبغاني انا اقولها وراه والسمع كويس لاني احيانا اشغل انشودة طيور الجنه بصوت منخفض وعلى طول يجي او اعد له فيبتسم يعرف اني راح اشيله؟؟
ابي تعليقك الله يرضى عليك ويشفي ولدك وتشوفه عرريس

 

[كوكـتـيـل طبيعي]

رد: متى وكيف اكتشفتي اصابة ابنك بالتوحد

الله لا يعيدها هالايام

نفس الشيء بالضبط ونفس الشكوك ونفس الفحص ايه بي آر

الحمد لله

 

[ابو فصولي]

رد: متى وكيف اكتشفتي اصابة ابنك بالتوحد

في اي عمر اكتشفت هذا الشي يا ابو فصولي لا ن ولدي ما يرفرف بيديه ولا يضرب براسه بس له فتره دايم يقول اخخخخخ والحين يقول ابه وعلى طول يطالع فيني يبغاني انا اقولها وراه والسمع كويس لاني احيانا اشغل انشودة طيور الجنه بصوت منخفض وعلى طول يجي او اعد له فيبتسم يعرف اني راح اشيله؟؟
ابي تعليقك الله يرضى عليك ويشفي ولدك وتشوفه عرريس

اختي ولدي فيصل كان طبيعي جدا وكان يتواصل بصري وكان يقول بابا ماما لكن مايقصدنا فيها ويحب طيور الجنه اول مايسمعها يجي يركض .

لكن سبحان الله ماكان عنده اي علامات سوى انه مايتكلم واذا عصب يضرب راسه بالارض وكنا نضحك على عصبيته

للاسف انا ماعندي صور لاولادي وهم صغار، وعن طريق الصدفه فتشت جوالي القديم الشهر الماضي وحصلت فيه صورة لفصولي اول مااكتشفنا المرض والكلام هذا قبل سنه يعني كان عمره وقتها سنتين يوم شخصناه .

لاحظي بالصورة كان يتواصل بصري ( عمره سنتين بالصورة ) :

وبعد التشخيص بشهر او شهرين بدأ يرفرف وبدأ النشاط الزايد يبين فيه وصار مايركز ابدا وصار يحط ايده على اذنه كثير وتغيرت ملامحه وصار واضح عليه انه متشتت الذهن ويسرح كثير وعيونه ذبلانه كانه مريض، لاحظي الصورة هذي امس ( عمره ثلاث سنوات وثلاث شهور ) :

شفى الله مرضانا ومرضاكم

 

[مهاجرة]

رد: متى وكيف اكتشفتي اصابة ابنك بالتوحد

فعلا كلامك صحيح يا ابو فيصل ملامح فيصل الله يبارك فيه تغيرت وعيونه ذبلانه .... الله يشفيه يا رب ويشفي كل اولادنا

 

[أصعب إحساس]

رد: متى وكيف اكتشفتي اصابة ابنك بالتوحد

طيب وش تنصحوني بالنسبه لولدي ؟؟
اوديه لاخاصئية نطق وتخاطب ؟؟
علمأاني ناويه بإذن الله اوديه حضانه او روضه عشان يختلط بالاطفال بداية الدراسه لان ماعنده احد وحداني ؟؟ ابغاه يحتك بالاطفال يعني بأشوف الين يصير عمره سنه ونص ؟؟
وش رأيكم

 

[مسك]

رد: متى وكيف اكتشفتي اصابة ابنك بالتوحد

الله يشافي ولدك يارب انت بدات معاه حميه لان الحميه في بدايتها تسل الولد وتخلي عيونه غائره وحوالينها هاله سوداء الله يشفيه يارب والله صورته الثانيه تعور القلب
انا قبل سنه بالضبط فحصت ولدي وشخصته عبير عوض طيف توحد كان في رمضان العام الماضي لكن اخي انصحك كل شيء مفيد لمرض التوحد لازم تجربه امنع الاكل الغير مفيد ويحوي الوان صناعيه اعتمد على الاكل الطبيعي خضار فاكهه وراح تلاقي بالمنتدى بالتفصيل الله يعطيهم العافيه وراح اتحس بالفرق وانشالله ولدك يصير زين
اللي شككني بولدي اذا شاف مساحه مفتوحه يركظ يبي يشوف نهايه العالم واذا ناديته مايرد علي بس هالملاحظتين وديته الطب التطوري وفحصنا عصب السمع وكل هالدوامه وشك الاهل بشيء هو بدايه الخيط يارب سترك

 

[ابو فصولي]

رد: متى وكيف اكتشفتي اصابة ابنك بالتوحد

الله يشافي ولدك يارب انت بدات معاه حميه لان الحميه في بدايتها تسل الولد وتخلي عيونه غائره وحوالينها هاله سوداء الله يشفيه يارب والله صورته الثانيه تعور القلب
انا قبل سنه بالضبط فحصت ولدي وشخصته عبير عوض طيف توحد كان في رمضان العام الماضي لكن اخي انصحك كل شيء مفيد لمرض التوحد لازم تجربه امنع الاكل الغير مفيد ويحوي الوان صناعيه اعتمد على الاكل الطبيعي خضار فاكهه وراح تلاقي بالمنتدى بالتفصيل الله يعطيهم العافيه وراح اتحس بالفرق وانشالله ولدك يصير زين
اللي شككني بولدي اذا شاف مساحه مفتوحه يركظ يبي يشوف نهايه العالم واذا ناديته مايرد علي بس هالملاحظتين وديته الطب التطوري وفحصنا عصب السمع وكل هالدوامه وشك الاهل بشيء هو بدايه الخيط يارب سترك

الله يجزاك الف خير
لا ماسويت له حمية لحد الحين، لكن ناوي ان شاء الله بعد التحليل

 

[ام التوحد]

رد: متى وكيف اكتشفتي اصابة ابنك بالتوحد

بوفصولي ...الله يحفظ لك ولدك
انا ولدي كان دايما يحط ايده على اذنه شوف عندهم الصوت العادي مزعج ويسبب لهم الم بس الحمد لله بعد التكامل السمعي تقريبا اختفت هذي الحركه
حاولوا محد يصرخ عنده ولا يروح حفلات تكون فيها اصوات عاليه او حتى التلفزيون يكون الصوت مو عالي
التوحد دايما تكون بدايه اعراض خفيفه ومع الوقت يزيد شي ورا شي
انا ولدي كان هادي ونومه ممتاز واكله طبيعي وخروجه (عزكم الله) طبيعي لغايه عمر سنه وشهرين بدا ما يطالع بالعين وبعدين ما يرد على اسمه كأنه مايسمع وقتها مافي طيور الجنه كان يحب التلي تبيز و بارني وانا كنت فرحانه انه ما يزعجني وبعدين تخربط النوم ووووو انتوا تعرفون
بس الحمد لله بعد الحميه هي اول شي يتعب جسمه بعدين يتعافى بأذن الله وتبين تحسنات

 

[ام عموري الغالي]

رد: متى وكيف اكتشفتي اصابة ابنك بالتوحد

الملاحظ اغلبنا بدات تساؤلاتنا بعمرسنة وشهرين او اكتر شوي
كنا خضنا نفس المراحل تقريبا ما عندي شي اضيفه غير الدعاء الله يشفي اطفالنا وجميع مرضى المسلمين

 

[ام فروسه]

رد: متى وكيف اكتشفتي اصابة ابنك بالتوحد

الله يشفينا اولادنا ..
والله شكلها بدايتي انا قبل بكثير .. مع المعاناه ..
بس الله كريم ..
اللهم في هذا الشهر المبارك .. اشفي اطفالنا وصبرنا وقوينا ..

 

[ام هاني]

رد: متى وكيف اكتشفتي اصابة ابنك بالتوحد

فعلا بعمر السنه وشهرين بدأنا نلاحظ تغيراته من عدم الرد وعدم اللعب وفقد الكلام على السنه واربع شهور كنا متاكدين ان الله كريم وماكتب لنا الا الخير
وان شاء الله بنتابع سوا التطورات

 

[أنت الأمل]

رد: متى وكيف اكتشفتي اصابة ابنك بالتوحد

الله لايعيد ذيك الأيام من جد
ماهر لاحظت عليه من عمره سنه ونص وكنت اٌقول لا طبيعي اضحك على نفسي كان يرفرف يمشي على اطراف اصابعه يحب طيور الجنة موووووووووووووووت ومايرد على اسمه بس بعد كم شهر أصريت على أهلي يودوه لدكتورة نفسية اطفال وعملو له اختبيار السمع طلع سليم وتخطيط للمخ سليم ولله الحمد ولماعملت اختبار كارز للتوحد طلعت النتيجة توحد بسيط نسبته 32% بس بسأل ممكن تزيد النسبة؟