موقف ضايقني ..الله يسامحه

[قلبي ضاع معك]

اليوم رحنا تفطرنا في بيت ناس اهلنا .. وطبعا حمودي وياي .. كل اسبوع نروح لهم نفس هالموقف يتكرر لكن هالمرة ما قدرت اني امسك نفسي من البكاء ..
يمكن انا حساسة اشويه صايرة بس انتو الحكم ؟ خبروني هل انا الحساسة ولا هالشخص هو اللي غلطان ..

كنا فارشين سفرة الفطور وحمودي لما يشوف السفرة يشتهي اكل منها يروح جنب الناس وما يعرفون شنو يبغي ويبدأون يعطونه اشياء لما يروح . وانا قلت للخدامه تحط له من كل شئ يحبه في صحن وتخلي له الاكل على جنب عشان ما يضايقهم ..
الا واحد منهم يقول اخذوه للمطبخ خلوه هناك .. قلت له ليش خله هنا يأكل معنا .. هو مضايقك بحاجه .. هادئ مثل النسمه ما منه اي اذى .. عكس باقي الاطفال ازعاج ولعب وشطانه .. هذا الموقف ذالك الاسبوع .

هالاسبوع كنت اصلي ورحت للمطبخ وشفت حمودي قاعد في المطبخ بروحه وجنبه الاكل .. قلت للخدامه ليش تخليه هنا هو قطو يعني يأكل بروحه ..قالت لي فلان اللي قال لي ..
انا انقهرت لان هالموقف الثالث اللي يتكرر .. المهم انا جتني الغبنه وشلت اكله وفرشت له في الصالة وجا واحد من الاطفال يبغي يقعد مع حمودي عشان يأكل معه الا يقوله لا تعال توتو انت تأكل هنا معنا .. لا تروح هناك ؟ الا يقولي تعالي ما بتأكلين وصرت ابكي بقوة ... الا يقولي ليش تضايقين نفسك عشان ابنك مريض خلك ايمانك بالله قوي ..

انا رديت عليه قلت له الحمد لله .. وسكت وانا اكل طبعا ما حبيت ازود في الكلام على الفطور وانغص عليهم لكن ما قدرت الغصة وقفت لي في صدري كأني مخنوقة ..
ورجعت البيت وانا ابكي ..
تبغون تعرفون منو هذا الشخص ....... اقرب الناس لي ..ما لي قلب اقولكم منو .. لكن الله اعلم بنيته ....ليش يعني ولدي فيه مرض معدي بيعدي الاطفال ولا انا اللي حساسة وغلطانه ... فهمووووني لاني مو قادرة امسك نفسي من البكاء من رجعت من عندهم..

 

[ضي القناديل]

رد: موقف ضايقني ..الله يسامحه

ياحبيبتي شكله اخوك وإلا ؟ ترى بعض الاخوان قلوبهم قاسيه الله يهديهم
يابنت الحلال ربك بيعافي ابنك وبيفرحك فيه وبتشوفينه احسن وافضل من اولادهم كلهم وان شاء الله ربي بيأثرك عليهم وابنك وسعي صدرك وقولي فوضت امري إلى الله ان الله بصير بالعباد وانسي الموضوع ترى اي احساس سلبي يأثر على صحتك وركزي هالايام على الدعاء لابنك بالشفاء والعافيه والله هو حسبنا وولينا وعليه اتكالنا

 

[سمر خالد]

رد: موقف ضايقني ..الله يسامحه

يا روحي يا ام محمد ، هو الموقف اكيد بيضايق و بيخنق كتييير بس انتي برضو حساسة كتير و لازم تبقي اقوي من هيك و لازم قبل ما تفوتي اي مكان لازم تتوقعي مثل هالاشياء و حتي من اقرب الناس إلك ، حتي لو كان مثلا من ابو محمد نفسه :17:، احيانا الاهل بيضايقو من اطفالنا في الجمعات و العزايم و بيتهيالهم انه اروق إلنا و للناس انه نعزل الاطفال عنا بس انتي خليكي هيك قوية و لا ترضي لانه حمودي ما بيعيبه شي .​

تحياتي يالغالية و روقي ما بنحب نشوفك متضايقة ​

 

[قلبي ضاع معك]

رد: موقف ضايقني ..الله يسامحه

ضي القناديل ..
لا مو اخوي .. ما ادري وش فيني مو قادرة اسكت من البكي .. احس نفسي مخنوقه .. وما احد حاس فيني .. الحمد لله على كل حال

 

[قلبي ضاع معك]

رد: موقف ضايقني ..الله يسامحه

سمر خالد ..
هلا حبيبتي .. انا هالايام بزوده نفسيتي تعبانه ومو متحمله لكن هالموقف من بداية رمضان بيتكرر .. وهالمرة ما قدرت ما اتضايق .. ما كان ودي اضايقكم لكن والله ما عندي احد اشكي له الا الله وانتم .. لاني حاسه اني لو ما تكلمت بختنق .. انا اعرف ان الموقف بسيط والجاي اصعب .....لكن الله يعينا ويقوينا ..

 

[بسبوسه]

رد: موقف ضايقني ..الله يسامحه

طولي بالك حبيبتي والموقف بصراحه جدا قاسي بس ماشاء الله عليكي مسكتي نفسك وربي الكعبه لو انا وقفت هل موقف لاطربقه البيت على راسه وعرفه قيمت نفسه وخليه يحسب الف حساب قبل يمسيني وابني بنص كلمه

هو مسكين فرحان بعياله ؟؟؟يختي الدنيا ماعليها ضمان ممكن ربي ياخذ منه هنعمه في دقيقه
ولا يهمك ولا تضايقين هو مريض يبيله علاج نفسي

 

[تفائلوابالخير]

رد: موقف ضايقني ..الله يسامحه

لا انتى مش حساسة ولا حاجة عندك حق تزعلى بس المرة الجاية لما تشوفية
اشرحيلة انك زعلتى وان دة مش لازم يتكرر تانى

 

[قلبي ضاع معك]

رد: موقف ضايقني ..الله يسامحه

بسبوسه ..
الحمد لله على كل حال .. الله يسامحه ما ادري بنيته لكن الله كريم كان ودي اقوله ولدي ملاك من الجنه ....لكن لساني انربط بالبكاء .. بعدين يقولون انا غيرانه من باقي الاطفال ولا انا حساسة السكوت احسن وربك يسامح

 

[قلبي ضاع معك]

رد: موقف ضايقني ..الله يسامحه

تفائلو بالخير ..
ماني رايحه بيتهم الله لا يحوجني لاحد لا انا ولا طفلي .. عشان يرتاحون منا

 

[تفائلوابالخير]

رد: موقف ضايقني ..الله يسامحه

تفائلو بالخير ..
ماني رايحه بيتهم الله لا يحوجني لاحد لا انا ولا طفلي .. عشان يرتاحون منا

محبتش اقولك كدة عشان صلة الرحم
لكن ممكن صلة الرحم فى التليفون
او تكون العزومة فى بيتك وان حب يجى اهلا
انتى محتاجة اعصابك وصحتك عشان ابنك

 

[اتكالي على الله]

رد: موقف ضايقني ..الله يسامحه

حبيبتي ولا يهمك ..... هذا ابتلاء من رب العالمين وصدقي هو خايف انه ابنك يثور او يؤذي الاطفال لانه هذه الفكرة السائدة انه اطفالنا مجانين ممكن يؤذون الاخرين التمسي له العذر ........ وصحيح ما في احد يحس باللي بينا ومافي احد يصدق انه اولادنا يحسون ويشعرون والهم مشاعر واحاسيس كل اعتقادهم انهم اطفال مغيبي العقول والمشاعر ... بس صدقي يا اختي ان شاء الله رب العالمين يتمم شفائه ويكون الك قرة عين لانه رب العالمين كريم بينا وانا متاكدة انه اولادنا راح يجازونا بالخير على تعبنا معاهم ... حتى اذا مشفنا هذا اليوم فجزائنا عند رب العالمين ..... تعرفين انا من يوم اللي عرفت بنتيجة التحاليل ما طلعت طه الا للتدريب واليوم دقت علينا الباب وحدة صينية تبيع دي في دي وفتحت لها الباب قلت الها ما نريد ظل حبيبي طه يبكي يريد يطلع برا ..والله انكسر قلبي عليه
الله يشافي اولادنا وكل مرضى المسلمين يا حبيبتي لا تزعلين

 

[قلبي ضاع معك]

رد: موقف ضايقني ..الله يسامحه

اتكالي على الله ..
لا هم يعرفونه مسالم ولا يسوي شئ في اي احد يعني ما يضرب ولا حتى يدافع عن نفسه .. وهالطفل مو ابنه اصلا .. لكن ما ادري بنيته .. الله يعين ..

تفائلو بالخير ..
لا تخافي انا ما احب اني اقطع صلة رحمي بس على وجبة ماني رايحه ..

 

[انوشا]

رد: موقف ضايقني ..الله يسامحه

انا ولدي من يشوف جمعه ناس يصير عنده استنفار يصارخ ويلزق فيني ويظل يحن ما يخليني اقعد مع الناس ولا يبي خدامته ولا احد دايما يحرجني جدام الناس بس انا الحين تخطيت ها المرحله صرت ما احس بالناس ولا يهموني اهم شي ولدي ثاني شي بالنسبة للزوارة والجمعة قبل لا تروحين عطي ابنك اكل خليه يروح شبعان لما يحطون الفطور خليه مع خدامته يروح يلعب عشان ما تتضايقين ولا تضايقين اهلك واجرك يا حبيبتي على الله محد يحس فيكي حتي زوجك ما يعاني ويفكر مثلك خليها علي الله بس

 

[اتكالي على الله]

رد: موقف ضايقني ..الله يسامحه

اتكالي على الله ..
لا هم يعرفونه مسالم ولا يسوي شئ في اي احد يعني ما يضرب ولا حتى يدافع عن نفسه .. وهالطفل مو ابنه اصلا .. لكن ما ادري بنيته .. الله يعين ..

تفائلو بالخير ..
لا تخافي انا ما احب اني اقطع صلة رحمي بس على وجبة ماني رايحه ..

حبيبتي ... رب العالمين يعلم بالنوايا وهو اللي يجازي بس اقول لك اذا هو صاحب البيت المرة الجاية لا تروحي لكن اذا مو هو صاحب الدعوة وهو ضيف لا لازم تروحين لانه حالك من حاله وانت رايحة بدعوة من اهل البيت ولا يهمك منه لو منو مكان مادام مو صاحب البيت ماله حق يتكلم ولا تحرمين ابنك من الاختلاط مع الاطفال من عمره بسبب ناس ما تقدر مشاعر اطفال حساسين .....

 

[قلبي ضاع معك]

رد: موقف ضايقني ..الله يسامحه

انوشا ..
حمودي كل شئ يشوفه يبي يأكله حتى لو شبعان ما ادري من مشاكل البطن والهضم اللي عنده ... وخصوصا لو شاف البطاطا وبعض المأكولات المفضلة .. ولكن مو المفروض انهم عارفين بمرضه ويتحملونه حتى لو جا لعندهم كفاية باقي الاطفال وشطانتهم ولعبهم وازعاجهم ... صدق الناس ما صار عندهم احساس بالطفل المريض ولا يراعونه ... الله كريم يا اختي واذا على الزيارات انا مقلله منها قد ما اقدر بس صلة الرحم واجب .. والحمد لله على كل حال ......وحسبنا الله وهو نعم الوكيل ..

اتكالي على الله ..
يصير خير يا اختي احنا اذا كان طفل طبيعي ولازم ان نتحمل شقاوته وشطانته بما بالك بحالة حمودي ما يفهم و لا يعرف الصح من الخطأ وايظا فوق هذا والله هادئ ما منه ازعاج ساعات يلعب بمفاتيح الكهرباء هذا اكثر ازعاج يسويه .. الله يهديه ويشفيه ويبلغني فيه

 

[ام محمد الغالي]

رد: موقف ضايقني ..الله يسامحه

ياعمري ربنا يصبرك يارب المشكله انه الناس مو حاسة فينا ونفينا تعامل ابناءنا زي الاطفال العاديين، لكنهم احس احيانا بحاولو يتعمدو انه يذكرونا بمرض اولادنا
الله المستعان ويشفيلنا اياهم ويبدل حالهم يارب من اسوا حال الى احسن حال، وربنا يوفقهم لما يحب ويرضى ويقر اعيننا بهم يارب العالمين
اهم شي طنشي كل الناس وولا يهمك احد الحمدلله اولادنا احسن من غيرهم بكثير

 

[قلبي ضاع معك]

رد: موقف ضايقني ..الله يسامحه

ام محمد وليان
الحمد لله اللي اعطانا اطفال مثل ملائكة الجنه لا يعرفون الحقد ولا الغيرة و قلوبهم بيضا ... والله لما اشوف كيف باقي الاطفال يعملون مشاكل لامهاتهم بالزن والبكي والشطانه اقول الحمد لله حمودي حبيبي مو مغلبني بس ربي يشفيه لي ويعطيه الصحه والعافية

 

[الفروله الحلوه]

رد: موقف ضايقني ..الله يسامحه

يابعد قلبي يا ام حمودي الموقف الي مر عليك مو سهل بل العكس انا اعتبره صدمه نفسيه لكي بل هي صدمه قويه جدا لكي انتي يا أمه ولكن الطفل صغير ولا يفهم ولايعي ما يدور حوله والا اذا كان يعرف لأصيب هو في صدمه من هذا التعامل القاسي ولا استطيع القول الا(الي يده في النار مو مثل يده في المويه)ولكن مني نصيحه اخت معانيه من تعامل الناس من بين الشفقه والقسوه أن تصبري وتحتسبي الاجر ليس فقط في الحياة مع حمودي بل ايضاََ مع تعامل الناس معه وبأذن الله سوف يتعافى حمودي و يكون هذا الموقف الذي مر بك مجرد ذكرى مؤلمه ​

 

[ام ميسم]

رد: موقف ضايقني ..الله يسامحه

ولا يهمك انا متاكدة انك لاحساسة ولا مضايقة من الموقف بهذا القدر . بس انت نفسيتك تعبانة واعتقد ان عندك حالة اكتئاب عابرة ، انا تجيني احيانا مثل هذه الحالات واحط غضبي وبكائي على اقل واقرب موقف من يحصل لأبني بالذات .والله وانا بأكتب هذه السطور حاسة نفسي بتطلع مني وماني طايقه ولا احد . انا حاسة فيكي وما انكر ان هذه المواقف تحبط من معنوياتنا ، ولكن هذه غمة وان شاء الله بترحل عا اجمعين.
اكثري من الأستغفار والصلاة على الرسول .

 

[قلبي ضاع معك]

رد: موقف ضايقني ..الله يسامحه

الفراولة الحلوة ..
ساعات وقت الزعل يكون الانسان يفكر بشكل مختلف لكني متأكده انها راح تكون مجرد ذكرى ما اثرت فيني ولكنها جعلتني اكون اقوى ... الضربة اللي ما تقتلك تقويك .. ويمكن الموقف بشكله تافهه لكنه عنى لي الكثير وعلمني اني ما اخلي للناس فرصة انهم يجرحوني او يجرحون ابني .. مهما كان ..
حاليا بكائي توقف الحمد لله واصبحت افكر بعقلانيه اكثر .........الانسان اللي ما يقدر ابني ولا يحترم مشاعره لا يحترم مشاعري ايظا ولن احترمه ابداااا ... وهذا قراري من الان ..