ولدي حبيبي الى الآن ما قالي ماما ..

[أم ليالي]

السلام عليكم

في البداية أعتذر ماني عارفة القسم المناسب على شان أطرح موضوعي
الحمدالله الله رزقني بتوأم أولاد كملوا سنتين بتاريخ 14/10 أمس الحمدالله .

(التوأم الثاني) : طبيعي جدا يفهم لمن أناديه أو أطلب منه يترك الشي الفلاني أو يسكر الباب.. اسم الله عليه يفهم علي ومتعاون
ينطق ماما - بابا - أسماء الشغالات - اسم اخته ..عطيني أو أبي بمعنى ما شالله ذكي ما عليه كلام ..

( التوأم الأول) : اسمحولي على الاطالة حابة أكون بشرحي واضحة ودقيقة على شان تشخص حالته عدل
الى وقتنا الحالي دكتور ما نطق بولا كلمة احس قلبي يتقطع لمن أشوفه كلمة ماما ما سمعتها منه ولا حتى أي كلمة ثانية .. صادف قليل جدا يمكن نادر سمعت كلمة باي عند الباب ويجوز أكون غلطانة..
يحب يلعب بالتواير بس شلتها منه عزلتها , اذا طلعنا بالسيارة ومرت سيارة يحاول ان يطالع التواير تدور لاحظته ..
مرة من المرات واقفة معاه بممر أحد المستشفيات يمشي عني بعيد ولا حتى لف وجهه للخلف مو من الأطفال اللي يبتعد عن أمه ويفتقدها يروح بعيد .
يسرح وايد وبدوري أنا أحاول انه أخليه ينتبه علي ..
ما يلعب مع الأطفال ولا يتشارك معاهم بشي اذا بنتي والتوأم الثاني قعدوا يلعبون يركضون ورا بعض أحاول أشاركه معاهم امسكه من ايده وألحقهم معاه يدور شوي بعدين يبعد ايده عني ويروح الغرفة يلعب بروحه بسيارته أو يشغل نفسه بأي شي ثاني ...
والله أناديه باسمه وايد وأكرر 10 مرات - 20 مرة ما يلف ويهه ولا أصلا ينتبه لي .
يحب يطالع أفلام الكارتون ويصفق معاها فجأة ويصرخ حيل من الفرحة ومبتسم .
يحط ايده بفمه ومثل اللي يناغي ..

كنت مفكرة انه ما يسمع بالبداية بس لاحظت لمن يكون بغرفته وانا بالصالة قاعده أطالع التلفزبن وطلعت أغاني أو أناشيد قناة سبيس تون أو شي يخص الأطفال يطلع من الغرفة ركض للتلفزيون مال الصالة ويقعد يطالع ويبتسم أو يصفق ..
أغني له أغاني معينة مثل بارني وتيلي توبيز يضحك ويستانس ويصفق .. أمسك الكرة وأرميها عليه وعلى اخوانه يصرخ ويضحك يصفق ويلحق الكرة ثواني لكن بالأخير يوقف .
صادف لمن الشغالة تفتح باب غرفتها وأهو ما شافها وتنادي كذا مرة يروح لها أو حتى من غير ما تناديه بس يسمع الباب صادف مرة .

قمت أعلمه على المصافحة ان أقوله سلام وأمد ايدي اليمنى ومع الوقت يمد ايده بالمثل مو وايد..
لمن ابدل ملابسه أخذه معاي واعطيه ملابسه وانا واقفة يمه يرميهم بالسلة ..
اعطيه تكرم الحفاظة مالته وانا بجنبه يقطها بالزبالة ..
باب الشقة اذا فتحناه على شان أبوه يبي يطلع وبعدها سكرناه يقعد يبكي ..
أعطيه كراسة وقلم يستانس ان يشخبط يمسك القلم ويشخبط وهو فرحان .

أخذت مواعيد عند مركز النطق والسمع + موعد بالطب التطوري .

اخصائيي الأحباء شنو تنصحوني؟؟ شنو أسوي معاه ؟؟ طمنوني الله يريح بالكم والله تعبانه احاول ابين لزوجي اني قوية مافيني شي وانا بالصج هلكانة وضعيفة سامحوني طولت عليكم وأتمنى تجاوبوني بأقرب فرصة شنو المفروض أتبع ..

 

[شاطئ الأمل]

رد: ولدي حبيبي الى الآن ما قالي ماما ..

ام اليالي كيفك أن شاء الله بخير عزيزتي لا دعي للقلق بما انك أخذتي موعد لدى اخصائي تخاطب وموعد لدى الطب التطوري
فهذا افضل تصرف وليس امامك وأمامنا إلا انتظار نتائج المواعيد عزيزتي اتوقع ان التنائج تكون سليمه بإذن الله ارجو منك عزيزتي ان تخبريننا عن النتيجه يعطيك العافية ونحن في الخدمه .

 

[صابرعلى همي]

رد: ولدي حبيبي الى الآن ما قالي ماما ..

ننتظر النتايج وطمنينا وانااخوك

 

[تناهيد]

رد: ولدي حبيبي الى الآن ما قالي ماما ..

هلا فيك اختي
الله يخلي لك اولادك ويطمنك عليهم
تاريخ ميلادهم مثل تاريخ ميلادي :16:

 

[بنت التحدي]

رد: ولدي حبيبي الى الآن ما قالي ماما ..

حياك الله
ربي يخليلك اولادك وتطمئني عليهم
احترامي
بنت التحدي

 

[اسلام خليفة]

رد: ولدي حبيبي الى الآن ما قالي ماما ..

ان شاع الله خير وما يكون في اي حاجة ومتقلاقيش المنتدي كلة تحت امرك وتحت امر ابنك
ربنا يخلوهلك ويفرحك بية