الاخوات من ليبيا ...وينكم

[أم عزيمة]

رد: الاخوات من ليبيا ...وينكم

السلام عليكم
مشكورة اختى ام عزيمة انى ناوية ان شاء الله نبدا فى الحمية لكن نبى نسالك بحكم خبرتك وتجربتك شنى تنصحينى اندير قبل لا نبدا تعرفى والله عندك حق الكلام بالفلاقى اريح
واسهل وبالنسبة للرقية انى ولدى يهدى ويتريح لما ياخدها والحجامة عملناها مرتين ما فيش تطور يذكر ممكن لانه تبى الاستمرار الله المستعان احنى اللى علينا بنديروه والشفى من عند ربى العالمين:23:

لا شكر على واجب​

بس سؤال وين حجمتي ولدك ؟ لأن الحجامة اللي درتها لعزيمة متع الصغار يعني تخبيش بالبراية مش الكاسات وسحب دم لأنها صغيرة والمراة اللي تحجم قالتلي ما اتديرش بالكاسات للصغار اقل من سبع سنوات و الحمد لله زي ما ذكرتني الرقية و الحجامة تخليهم أهدى و الإدراك أفضل و الحمد لله .

عزيمة كانت لما تتفرج على طيور الجنة لما يجيبوا قرآن تسكر ودانها بأيديها و تعيط و تطلع بعد الرقية الحمد لله تأخذ في القرآن و تعطيه لأختها تبيها تقرا وليلاتي ما ترقدش إلا لما انرقيها .

أبدي بحمية الكازيين والمعلبات والألوان والحلويات و السكر الأبيض وراقبي وضعه لمدة أسبوعين راقبي كل شئ حتى أكرمكم الله إخراجه وأكتبي ملاحظاتك باش ماتنسيش شنو كلي و تصرفاته وبعدين قرري تبدي بحمية الجلوتين أو لا و يعاونك على الحمية وإن شاء الله بالشفاء .

 

[ام ملاك]

رد: الاخوات من ليبيا ...وينكم

السلام عليكم
بالنسبة للحجامة والرقية كانت عند شيخ يقرو عنده اولادى القران الكريم لما شاف ولدى المتوحد قال شفاه باذن الله فى القران والحجامة حجم مرتين
لكن بنتك ربى يشفيها ما زال صغيرة على الحجامة الاسلامية اللى فى الطب النبوى واذا تبى اى معلومة عن الراقى نبعتهلك عالخاص وتحياتى

 

[أم عبيدة]

رد: الاخوات من ليبيا ...وينكم

بارك الله فيك يا ام عبيدة والله ما قصرتى ربى يكون فى العون بنبدا ان شاء الله فى الحمية لانه عندى احساس انها تتماشى مع ولدى لانه الاحظ لما يكتر من الحلو او العصائر والمعلبات يبدا متوتر وعصبى وعدوانى انى منتظرة نصايحك ودعائك والله المستعان

شكرا ام ملاك ....و تفضلي لو فيه اي سؤال تحت امرك ....ربي يحفظ ولدك و يشفيه .

 

[أم عزيمة]

رد: الاخوات من ليبيا ...وينكم

:2:

السلام عليكم
بالنسبة للحجامة والرقية كانت عند شيخ يقرو عنده اولادى القران الكريم لما شاف ولدى المتوحد قال شفاه باذن الله فى القران والحجامة حجم مرتين
لكن بنتك ربى يشفيها ما زال صغيرة على الحجامة الاسلامية اللى فى الطب النبوى واذا تبى اى معلومة عن الراقى نبعتهلك عالخاص وتحياتى

السلام عليكم أم ملاك

ما فيش نقاش أكيد علاجهم الحجامة و القرآن وزي ما قلتلك المراة اللي تحجم في عزيمة شابة تخاف ربي ملتزمة يعني هادا علاش قالتلي نحجمها بس مش بالكاسات لأنها مازال صغيرة وتحجم في الكبار بالكاسات ، بعد فترة عزيمة خدت منها الصنعة :2: وبدت تعاون فيها وتحط معاها في الكاسات لما انا نحجم !!! و الحمد لله هذا دليل ان عزيمة تركيزها زاد و الحمد لله .

وبارك الله فيك و ياريت تبعتيلي معلومات على الراقي وربي يشفي الجميع :23:.

 

[أم حنيفة]

رد: الاخوات من ليبيا ...وينكم

السلام عليكم و رحمة الله و بركاته اخواتي الليبيات
اسعد الله ايامكن و شفا الله ابناءكن
انا كذلك عملت لابني حجامة ثلاث شهور متتابعة مرة كل شهر و انا هنا لا يوجد احد يقوم بالحجامة الا زوجي توكلنا على الله و قمنا بها في البيت وكانت الحجامة دموية بالكاسات و كان عمر ولدي تقريبا 5 سنوات الذي لاحظته هو تباعد التشنجات كان كل ثلاث شهور يتشنج مرة واحدة حتى اختفت و لله الحمد
و ساعيد التجربة مرة اخرى ان شاء الله تعالى
شفا الله ابناءنا جميعا يا رب

 

[أم عبيدة]

رد: الاخوات من ليبيا ...وينكم

السلام عليكم و رحمة الله و بركاته اخواتي الليبيات
اسعد الله ايامكن و شفا الله ابناءكن
انا كذلك عملت لابني حجامة ثلاث شهور متتابعة مرة كل شهر و انا هنا لا يوجد احد يقوم بالحجامة الا زوجي توكلنا على الله و قمنا بها في البيت وكانت الحجامة دموية بالكاسات و كان عمر ولدي تقريبا 5 سنوات الذي لاحظته هو تباعد التشنجات كان كل ثلاث شهور يتشنج مرة واحدة حتى اختفت و لله الحمد
و ساعيد التجربة مرة اخرى ان شاء الله تعالى
شفا الله ابناءنا جميعا يا رب

اختي الغالية ...
شكرا على ذكر تجربتك ...اعتقد أن الحجامة تفيد فعلا و هذا ما لاحظته مع ابني .
ابني و الحمد لله خلال الاسابيع الاخيرة تحسن كثيرا عن السابق يستجيب و يتواصل افضل من قبل و يركز افضل بكثير من قبل ...و كنت خلال المدة الماضية اعمل له الحجامة التي تحدثت مرة عنها تشريط في اماكن معينة في الجسم اسبوعيا و الآن مرة كل اسبوعين ...و الحق يقال ان التحسنات الاخيرة في الاستجابة و التواصل كانت بفضل الله ثم هذه الحجامة ...الحمد لله على فضله .

 

[أم عزيمة]

رد: الاخوات من ليبيا ...وينكم

ابني و الحمد لله خلال الاسابيع الاخيرة تحسن كثيرا عن السابق يستجيب و يتواصل افضل من قبل و يركز افضل بكثير من قبل ...و كنت خلال المدة الماضية اعمل له الحجامة التي تحدثت مرة عنها تشريط في اماكن معينة في الجسم اسبوعيا و الآن مرة كل اسبوعين ...و الحق يقال ان التحسنات الاخيرة في الاستجابة و التواصل كانت بفضل الله ثم هذه الحجامة ...الحمد لله على فضله .

أم عبيدة
إن شاء الله كل يوم عبد الرحمن يكون أحسن لين تشوفيه دكتور يارب ، شوفي مرة دورت في النت على علاج الكهرباء الزائدة ولما كتبتهم وركزت عليهم لقيت الحاجمة تحجم في نفس المواقع و بما ان عبد الرحمن عنده مشكلة كهرباء زائدة هادا علاش تحسن فركزي على المواضع هادي و ناقشيها فيهم .

 

[أم عبيدة]

رد: الاخوات من ليبيا ...وينكم

أم عبيدة
إن شاء الله كل يوم عبد الرحمن يكون أحسن لين تشوفيه دكتور يارب ، شوفي مرة دورت في النت على علاج الكهرباء الزائدة ولما كتبتهم وركزت عليهم لقيت الحاجمة تحجم في نفس المواقع و بما ان عبد الرحمن عنده مشكلة كهرباء زائدة هادا علاش تحسن فركزي على المواضع هادي و ناقشيها فيهم .[/quote

مزبوط أم عزيمة هذا اللي صار ...الحاجمة اللي مشيتلها معاك و كملت معاها زادت في الجلسات الاخيرة تشريط في موضع الكهربا ...و شاورت شوية اختصاصين فقالوا لي عليك و على خلطة من السنامكي و البردقوش و المليسا ...عارفة السنامكي قوي شوية على الصغار على خاطر يدير اسهال ...لكنه مهم وقت نديروا الحجامة باش يساعد في التخلص من الاخلاط ...الكمية شوية و مش هلبة و ما دارتش حاجات مش مرغوب فيها و الحمد لله ...الحق ينقال المليسا ما عرفتهاش و ما درتهاش ....و صحيتي على الدعوة الحلوة لعبيدة .

 

[أم عزيمة]

رد: الاخوات من ليبيا ...وينكم

أختي أم عبيدة كيف درتي السنامكي أني نعرف أنها للكبار ملعقة لكل 50 كيلو جرام ؟ و هل درتي الخلطة زي الشاهي مردقوش و سنامكي مع بعض ؟ و أمتا أعطيتيهاله قبل الحجامة وإلا بعد ؟ تعرفيني أسئلتي هلبة لكن عارفاتك عمرك ما تقصري تحياتي .


أخوتي و أخواتي في ليبيا نبو نتشاركو أي معلومة مهما كانت بسيطة عن دكتور كويس أو سامعين عن علاج للتوحد أو خبراتكم في المراكز وأفضل مركز أو حتى إخصائيي نطق وتعديل سلوك ، خلونا نكتبوا تجاربنا ونفيدوا بعض والدال على الخير كفاعله و دعواتي للكل بالتوفيق و السداد .​

 

[أم عبيدة]

رد: الاخوات من ليبيا ...وينكم

أختي أم عبيدة كيف درتي السنامكي أني نعرف أنها للكبار ملعقة لكل 50 كيلو جرام ؟ و هل درتي الخلطة زي الشاهي مردقوش و سنامكي مع بعض ؟ و أمتا أعطيتيهاله قبل الحجامة وإلا بعد ؟ تعرفيني أسئلتي هلبة لكن عارفاتك عمرك ما تقصري تحياتي .

​

و لا يهمك أم عزيمة ما يغلاش عليك و على كل الاخوات ......
درت السنامكي قبل موعد الحجامة بيوم و في يوم الحجامة حتى هوا ....أهم شئ يأخذه قبل النوم بس 3 وريقات أو اربع إما مضغ و إلا على قولتك زي الشاهي مع ملعقة صغيرة بردقوشة ...أني استخدمتها مرة وحدة ...دقيتها بالمهراس و خلطتها بشوية عسل و عطيتها لعبيدة وقتـي ..طبعا بالسيف عليه مش برضاه :1:.
السنامكي ما يكثروش منه هلبة زي ما شفتي على خاطر الصغار... و أنا استشرت 2 من خبراء الحجامة لعلاج الكهربا الزايدة و اتفقوا الزوز على نفس الاعشاب و الكمية اللي وصفوها كانت تقريبا زي بعض.

 

[مراد البصير]

رد: الاخوات من ليبيا ...وينكم

السلام عليكم اخواتي من ليبيا انا زوجة الاخ مراد وسوف اتواصل معكم في نقل خبراتنا اولا اود ان نتاسف من الاخت ام امين على عدم الرد فالنت كان فيه مشكله عندنا بالنسبه للمركز في دبي هو مركز دبي للتوحد وتقدري تلقي الهاتف متاعهم في الانترنيت فاذا كنتي ترغبي في الكشف عليكي التصال بهم وهم يحددو موعد ويردو عليك وتوقعي الموعد مش قبل ستة اشهر الي انا شوفته بعد قراة الردود ان ابنئنا تشخصو عند نفس الدكاتره ووضعو في نفس المركز وقامو بالتحاليل في نفس المعامل فنصيحه مني اليكم استمرو في مراكز التاهيل حتى سن 6سنواتوبعدين يجب دمج الطفل في مدرسه عاديه حتى يستطيع الطفل ان يقرب من عالم الاطفال العادين وحتى تتطور قدراته وهذا الكلام من تجربتنا الخاصه فابني لايختلف كثيرا عن عزيمه او عبيده او امين فبدايته مثلهم الاانه الان في مدرسه خاصه عاديه ممع معلم خاصه خصصناه له لكي تساعده في الصف وقد نجحة في ذلك فهو الان يكون صداقات مع الاطفال ويخبرني عليها وقد تفوق في صف الاطفال العادين وجاب الترتيب الثاني بجداره فخلاصة القول ان اطفالنا محتاجين يقربو من عالم الطبيعين شويه باش يكسرو الحاجز لكن لازم هذه الخطوهتتم في وجود اناس واعين لحاله الطفل بقي شى اريد قوله رغم كل نجاحات ابني الاانه مزال يحتاج الى تاهيل سلوك وهذا مربط الفرس لانه لاتوجد مؤهلات في الساحه لذلك لانها تحتاج صبر وخبره لذلك نحنو نحاول الخروج في احد الدول التى لديها الخبره ولكن المانع الاول هو الماده فلا اخفيكم اقربهم لذلك هي مصر لانه الشخص اذا كان عنده مدخول معقول يقدر يظغط على نفسه شويه في سبيل اطفالنا فانا حبيت اسئل الخوات عن عنوان الحجام الى مشتوله وكذلك اختي ام عبيده عنوان الدكتور حسام بدر ولكم مني جزيل الشكر :23:

 

[ام ملاك]

رد: الاخوات من ليبيا ...وينكم

السلام عليكم
ما فيش حاجة جديدة انضيفها غير الرقية والحجامة والتاهيل فى المركز هدا اللى قادرة عليه فى الوقت الحاضر حتى الحمية اللى كنت متحمسة انى نبدا فيها تبى استعداد وميزانية خاصة بيها المهم فيه معلومة قريتها مرة فى منتدى تانى وبديت بالفعل فى تطبيقها وهى انه فى ساعة الفجر الاولى يكون الاكسجين بكترة فى الجو وبما ان ولدى يكون فايق وفى احسن حالات النشاط بعد الصلاة نطلع بيه ونحاول نخليه ياخد اكبر قدر من الهواء وبعمق ولاحظت انه تقل عصبيته وتوتره فى باقى ليوم ممكن انى انتخيل ممكن صح المهم انى مرتاحة انى ما نفوتهاش كل يوم وما يخفاش على حد انها ساعة مباركة ساعات الفجر الاولى الله المستعان ربى يفرجها على ولادنا ويجعل شفاهم على ايسر حال امين

 

[أم عبيدة]

رد: الاخوات من ليبيا ...وينكم

السلام عليكم اخواتي من ليبيا انا زوجة الاخ مراد وسوف اتواصل معكم في نقل خبراتنا اولا اود ان نتاسف من الاخت ام امين على عدم الرد فالنت كان فيه مشكله عندنا بالنسبه للمركز في دبي هو مركز دبي للتوحد وتقدري تلقي الهاتف متاعهم في الانترنيت فاذا كنتي ترغبي في الكشف عليكي التصال بهم وهم يحددو موعد ويردو عليك وتوقعي الموعد مش قبل ستة اشهر الي انا شوفته بعد قراة الردود ان ابنئنا تشخصو عند نفس الدكاتره ووضعو في نفس المركز وقامو بالتحاليل في نفس المعامل فنصيحه مني اليكم استمرو في مراكز التاهيل حتى سن 6سنواتوبعدين يجب دمج الطفل في مدرسه عاديه حتى يستطيع الطفل ان يقرب من عالم الاطفال العادين وحتى تتطور قدراته وهذا الكلام من تجربتنا الخاصه فابني لايختلف كثيرا عن عزيمه او عبيده او امين فبدايته مثلهم الاانه الان في مدرسه خاصه عاديه ممع معلم خاصه خصصناه له لكي تساعده في الصف وقد نجحة في ذلك فهو الان يكون صداقات مع الاطفال ويخبرني عليها وقد تفوق في صف الاطفال العادين وجاب الترتيب الثاني بجداره فخلاصة القول ان اطفالنا محتاجين يقربو من عالم الطبيعين شويه باش يكسرو الحاجز لكن لازم هذه الخطوهتتم في وجود اناس واعين لحاله الطفل بقي شى اريد قوله رغم كل نجاحات ابني الاانه مزال يحتاج الى تاهيل سلوك وهذا مربط الفرس لانه لاتوجد مؤهلات في الساحه لذلك لانها تحتاج صبر وخبره لذلك نحنو نحاول الخروج في احد الدول التى لديها الخبره ولكن المانع الاول هو الماده فلا اخفيكم اقربهم لذلك هي مصر لانه الشخص اذا كان عنده مدخول معقول يقدر يظغط على نفسه شويه في سبيل اطفالنا فانا حبيت اسئل الخوات عن عنوان الحجام الى مشتوله وكذلك اختي ام عبيده عنوان الدكتور حسام بدر ولكم مني جزيل الشكر :23:

أختنا زوجة مراد البصير ....مرحبتين بيك ....و صحيتي على كتابة تجربة ولدك معانا و على الكلمات المشجعة ..بس نبي نسألك ...شن هي العلاجات اللي درتيها من قبل لولدك .؟...و امتى بدا يتكلم ؟..و من وين لقيتي معلمة الظل الخاصة اللي مع ولدك في المدرسة ؟...اللي نعرفه أنه ما فيش في ليبيا معلمات ظل !!!...و إلا أنت تفاهمتي مع معلمة عادية بمرتب مقطوع !!....إن شاء الله غير ما كترتش عليك الاسئلة هلبة .
بالنسبة للحاجمة تسكن في عين زارة ...و إنتي جاية من الفرناج بعد قرية المزاوغة تلقي الخمسة شوارع ..التفرع الثاني على اليسار ...معروفين غادي ...تحجم ايام الاثنين و الثلاثاء و الخميس فقط .
اكيد فيه هلبة حاجمات معروفات في طرابلس ...لكن هاذي حسيتها شاطرة و ولدي من تاني جلسة ما شاء الله معادش عيط و لا بكى ...الشكر لأم عزيمة بارك الله فيها اللي رفعتني ليها ...مع أني كنت قبلها حاجمة ولدي مرتين عند مراة ثانية ...ربنا يسهل للجميع .
الدكتور حسام بدر مشيت له مرة وحدة و الباقي مرات نشاور فيه في بعض الحاجات عن طريق الايميلات ...هذا رقم العيادة ..تفاهمي مع السكرتيرة وهي تعطيك موعد 0020106689119 .
و أي حاجة تفضلي أنا في الخدمة .

 

[أم عزيمة]

رد: الاخوات من ليبيا ...وينكم

بالنسبة للحاجمة تسكن في عين زارة ...و إنتي جاية من الفرناج بعد قرية المزاوغة تلقي الخمسة شوارع ..التفرع الثاني على اليسار ...معروفين غادي ...تحجم ايام الاثنين و الثلاثاء و الخميس فقط .
اكيد فيه هلبة حاجمات معروفات في طرابلس ...لكن هاذي حسيتها شاطرة و ولدي من تاني جلسة ما شاء الله معادش عيط و لا بكى .

تصحيح بسيط يا أم عبيدة العنوان قبل قرية المزاوغة على اليسار التفرع اللي يرفع لصالة مورينا مش اللي يرد لسوق السبعة ، وزي ما قلتي هي شاطرة وأني مجربتها علي نفسي ما شاء الله عليها .

أم ملاك فعلا أول ساعات الصبح ممكن يحل بدل الأكسجين المضغوط غير ياخذ ياخذ وقت بس آمان أكثر و أرخص أكثر لكن الجو زي ماتعرفي صصصصصصصصصصقع لازم الصبح تغلفيه كويس :2: .

 

[مراد البصير]

رد: الاخوات من ليبيا ...وينكم

السلام عليكم جميعا بالنسبه للعلاجات ماجربتش حتى حاجه من قبل سو الرقيه الشرعيه بعد الفجر وقراة سورة البقره عند الفجر ايضا ولكن مطولتش عليها مش لان مالقيتش عليها ماعدا الله ولكن الظروف خلتني نتقطع عليها وهي الانجاب ووجود طفل صغير وماتغبيش انتي في حالة الصغار الفجر وانا اتفق مع الاخت ام ملاك على هواء الفجر وان سعاته مباركه اما بالنسبه لمعلمة الظل فهذه قصه نقولك عليها الابله الي الان مع ابني كانت اول ابله تتعامل مع محمد عند سن 5سنوات ولي كان محمد في هذاك الوقت يقول كلام بسيط وباللغه الفصحه الى تعلمها من التلفزيون وبلكنت الرسوم فقامت الابله بتعليمه مخارج الحروف وتعليمه كيفية التركيز والتي اخدة وقت طويل ولكن في النهايه جابة نتيجه والابله هذه كانت تسكن في الزاويه مكان سكنتنا وتشتغل في مركز تاهيل بالزاويه ومتخصصه في تاهيل التوحد ولكن متشديش عليا كلمة متخصصه ولكن من وجه نظري هي ارقى بكثير من الدكاتره الي جايبنها من الخارج:5:وهي انسانه لطيفه وفاهمه شن الدير مع الطفل كويس ربي يعطيها الصحه عللي دراته مع ولدي ومن غير طولت سيرة بقيت مع ولدي لمدة سنه وبعدين تزوجت وسكنت في طرابلس في هذه الفتره ولدي كان عمره 6سنوات حيث التحقه بمركز طرابلس ودخلوه على طول تعليمي وقالولي ان مستواه كويس فقلنا ربي يبارك وبقي معهم سنه فوجت ابني تحسن من الناحيه التعليميه فقط ومن خلال مطالعتي لاخبار الدمج قررت في يوم وليله ان نخرج ولدي من المركز ونخليه مع اطفال عادين فاتصلت بهذه الابله وعرضة عليها الفكره وشجعتني كثيرا وقالتلي انها مهمه وان ولدي وصل مرحلة الدمج ومانخفيش عليك مديرة المركز وابلاته كانو خايفين من عواقب الفكره ولكن احنا اصريناوالحمدلله ماندمناش فسجلته في مدرسه قريبه من سكن الابله ولى تعاونت معاي مديرتها هلبه بارك الله فيها وتواجدة معاه الابله داخل الفصل بشكل مستمر وكانت متابعه له بشكل كبير وقامت بدمجه مع زملائه و نجحت في ذالك والحمد لله ونحن ندفع لها معاش خاص والله شويه فيها وظلت على هذا الحال شهرين وبعدين احتاجة المدرسه لمعلمه فعرضو عليها الشغل ومسكت الفصل الي فيه ولدي وهو ماشي معاه كويس ولكن للاسف هي تبي تجيب في شهر 3 وانشاالله تلكا الفتره متاثرش على محمد ولكن هيا اكدتلي انه معادش محتاجها :23:وكما قتلك محتاج محمد تاهيل سلوك اكثر وانشالله نتوفقو في ذالك وياام عبيده الدكتور حسام في القاهره ولا وين انشالله منكونش تقلت عليكم ونكون نفعتكم :13:

 

[أم عزيمة]

رد: الاخوات من ليبيا ...وينكم

بارك الله فيك أختي علي التفاصيل اللي ذكرتيها وتجربتك مع ولدك بصراحة خطوة الدمج مهمة جداً لأطفالنا والمفروض من الروضة باش يتعلموا من الأطفال ، إن شاء الله تشوفيه في أحسن المراتب وربي ييسر طريقك

شني رايك تسجلي بإسم ثاني خاص بيك أنتي وخليه أسم هكي حلو يبعث الأمل .

تحياتي​

 

[ام ملاك]

رد: الاخوات من ليبيا ...وينكم

السلام عليكم
بارك الله فيك اختى ام محمد وان شاء الله تشوفى ولدك باحسن حال بالفعل الدمج ليه فائدة كبيرة لكن انتم عندكم حظ ما شاء الله اللى حصلتو مدرسة متفهمة وادارة تتقبل وجود اللى زى اطفالنا وانتى عارفة وضع مدارسنا سواء الخاصة او العامة انى ولدى تعليميا ماشى كويس لكن سمات التوحد ما زالت موجودة لهدا ما نقدرش انجازف ونطلعه من المركز رغم انى متاكدة ان الدمج احسن ليه بيش يتعود على سلوك الطبيعيين ويتواصل معاهم الله المستعان
اخواتى الجمعية الليبية بدت فى دورة لامهات التوحد امس كان الافتتاح وتنتهى يوم الخميس والدورة فى مجال طرق واساليب تعديل السلوك لدى اطفال التوحد من الساعة 4 الى الساعة 7 مساء بمركز الغد للتدريب طريق قرقارش بجوار مجمع زرقاء اليمامة خلف مركز سلطان لعلاج الاسنان امس تلاقينا مع الدكتورة نجاة الزليطنى وبتبدا اليوم ان شاء اللة فى محاضرتها عن طرق التعامل مع طفل التوحد
وهى فرصة بصراحة نستفيدو منها ومن خبراي غيرنا والله الوحدة منا ترتاح لما تلقى من يشاركها نفس التجربة والاحساس ومشكورة الجمعية الليبية على جهودهم
رغم الصعوبات وقلة الا مكانيات حبيت انبلغكم اللى عنده امكانية يجى ويحضر بيش انتلاقو ونستفيدو من بعضنا شنو رايكم

 

[مراد البصير]

رد: الاخوات من ليبيا ...وينكم

مشكوره اختي ام عزيمه واختي ام ملاك وباذن الله حندور اسم حلو ونسجل به وكذلك حنحاول اليوم نجي للملتقى باش نستفيدووالله ماتصوروش فرحتي بملتقانا على الاقل نشجعو بعضنا اكثر للى فيه مصلحة اطفالنا

 

[أم عبيدة]

رد: الاخوات من ليبيا ...وينكم

اخواتي العزيزات ...صحيتوا كلكم على تفاعلكم الحلو ...
و فعلا زي ما قالت أم عزيمة يا ريت أم محمد تسجلي بإسم خاص بيك باش نعرفوا على الاقل نكلموك بيه ....و صحيتي على ردك ...و بالحق أنتي محظوظة مع الابلة هاذي إذا كانت زي ما قلتي...... و ما شاء الله عليه ولدك ...باين عليه متقدم ( بسم الله ما شاء الله ) ...إن شاء الله ربي يحفظه و يباركلك فيه يا رب و تشوفيه عريس .
أم عزيمة.... ديمة موجودة و متفاعلة ...ربي يعطيك الصحة و ما يضيع لك تعب .
أم ملاك ....بارك الله فيك لأنك قولتي لنا علي الدورات ..و الله لو حصلت فرصة بإذن الله نمشي ...على الاقل نتلاقوا مع الامهات و نستفيدوا من بعض ...و على ذكر الاكسجين سمعت امس عالسريع من وحدة من الامهات اللي نعرفهم أنها تدير لولدها جلسات اكسجين هنا في ليبيا ...الصراحة هي كلمتني عالسريع و ما فهمتش منها تفاصيل اذا كان هوا نفسه اكسجين مضغوط و إلا لا ...وانا ما اهتميتش هلبة بالموضوع لأني ما نفكرش حاليا في هذه الخطوة ...حبيت نقوللكم باش تكون عندكم فكرة بس ....و لو حبيتوا نستفسر منها عالموضوع بالزبط.
أم محمد الدكتور حسام بدر ينزل مصر كل فترة ...هذا علاش قلت لك كلمي السكرتيرة و هي تنسق لك اذا كان تبوا تمشوا لمصر ...و ربي يوفق الجميع ...
و تقبلوا كلــ:مشكوره:ــــكم تحياتي

 

[سنفخر بابنئنا]

رد: الاخوات من ليبيا ...وينكم

اخترت (سنفخربابنئنا)وانشاء الله يعجبكم